برسلز(نیشنل ٹائمز) نائب وزیراعظم و وزیرِ خارجہ سینیٹر محمد اسحاق ڈار یورپی یونین کی نمائندۂ اعلیٰ برائے خارجہ امور کایا کالاس کی خصوصی دعوت پر تین روزہ سرکاری دورے پر برسلز پہنچ گئے۔
برسلز انٹرنیشنل ایئرپورٹ پر ان کا استقبال سیکرٹری خارجہ آمنہ بلوچ، یورپی یونین، بیلجیم اور لکسمبرگ کے لیے پاکستان کے سفیر رحیم حیات قریشی اور سفارت خانۂ پاکستان کے دیگر افسران نے پرتپاک انداز میں کیا۔
دورے کے دوران نائب وزیراعظم و وزیرِ خارجہ برسلز میں ہونے والے پاکستان۔ای یو اسٹریٹجک ڈائیلاگ کے ساتویں اجلاس کی مشترکہ صدارت کریں گے۔ اس کے علاوہ وہ چوتھے ای یو انڈو پیسیفک وزارتی فورم میں بھی شرکت کریں گے جہاں علاقائی اور عالمی اہم امور پر تبادلۂ خیال کیا جائے گا۔
سینیٹر اسحاق ڈار برسلز میں میرٹائم سکیورٹی سے متعلق منعقدہ اجلاس میں بھی شریک ہوں گے، جبکہ اس فورم کے موقع پر ان کی مختلف ممالک کے وزرائے خارجہ سے اہم دو طرفہ ملاقاتیں بھی طے ہیں۔
توقع ہے کہ نائب وزیراعظم و وزیرِ خارجہ کا یہ دورہ پاکستان اور یورپی یونین کے درمیان دو طرفہ تعلقات کو مزید مضبوط اور وسعت دینے میں اہم کردار ادا کرے گا۔