ہانگ کانگ(نیشنل ٹائمز) ہانگ کانگ کے بین الاقوامی ایئر پورٹ پر ایک کارگو طیارہ رن وے سے پھسل کر سمندر میں جا گرا، دو افراد ہلاک ہو گئے۔
ایئر پورٹ حکام کا کہنا ہے کہ لینڈنگ کے دوران طیارہ رن وے سے باہر نکل کر ساتھ ہی نصب حفاظتی باڑ سے جا ٹکرایا، اس دوران وہاں گشت پر مامور سکیورٹی کی ایک کار اس کی زد میں آ گئی، جو سمندر میں جا گری اور اس پر سوار ایئرپورٹ سکیورٹی کے دو اہلکار، جن کی عمریں 30 اور 41 سال تھیں، ہلاک ہو گئے۔حکام کے مطابق حادثے کے دوران طیارہ دو حصوں میں ٹوٹ گیا اور اس کے عملے کے چار ارکان دروازہ توڑ کر باہر نکلے، لینڈنگ کے وقت طیارے کی جانب سے کسی قسم کا ڈسٹریس سگنل نہیں دیا گیا تھا، تفتیش کار اب سمندر سے طیارے کے بلیک باکسز کو تلاش کرنے کی کوشش کر رہے ہیں۔حادثے کے وقت رن وے آپریشن کے لیے بالکل محفوظ حالت میں تھا، شمالی رن وے کو بند کر دیا گیا ہے اور اسے حفاظتی جائزہ کے بعد ہی دوبارہ کھولا جائے گا۔