اسلام آباد(نیشنل ٹائمز) جعفر ایکسپریس حادثہ کے بعد بھارتی گودی میڈیا ایک بار پھر پاکستان کے خلاف منفی پروپیگنڈا مہم میں سرگرم ہوگیا۔
ذرائع کے مطابق بھارتی میڈیا اپنے ملک میں جاری فسادات اور داخلی انتشار پر پردہ ڈالنے کے لیے پاکستان مخالف جھوٹے بیانیے کو ہوا دینے لگا ہے۔رپورٹ کے مطابق جعفر ایکسپریس کی کچھ بوگیاں ٹریک پر دھماکے کے باعث پٹری سے اتر گئیں، حادثے میں چند افراد زخمی ہوئے تاہم بھارتی میڈیا نے اسے کامیابی کے طور پر پیش کرنے کی مذموم کوشش کی۔سکیورٹی حکام کا کہنا ہے کہ بھارتی میڈیا اور فتنہ الہندوستان کی جانب سے تخریبی واقعات کو پروپیگنڈے کے طور پر استعمال کرنا ان کے گٹھ جوڑ اور دشمنانہ عزائم کو ظاہر کرتا ہے۔یاد رہے کہ بھارت کا گودی میڈیا 11 مارچ کے جعفر ایکسپریس حملے کو بھی غیر معمولی انداز میں پیش کرچکا ہے جبکہ پاکستان متعدد بار بھارت اور فتنہ الہندوستان کے گٹھ جوڑ کے شواہد عالمی برادری کے سامنے رکھ چکا ہے۔