تہران(شِنہوا)ایرانی صدر مسعود پزشکیان نے کہا ہے کہ شنگھائی تعاون تنظیم (ایس سی او) کے سربراہ اجلاس 2025 میں طے پانے والے معاہدوں پر عملدرآمد ایران کے لئے معیشت، سلامتی، سائنس اور سیاحت کے شعبوں میں سازگار امکانات پیدا کرے گا۔
ایرانی صدر کے دفتر کی ویب سائٹ پر جاری بیان کے مطابق انہوں نے ان خیالات کا اظہار اتوار سے پیر تک تیانجن میں سربراہ اجلاس اور جاپانی جارحیت کے خلاف چینی عوام کی مزاحمت اور فسطائیت مخالف عالمی جنگ میں فتح کی 80 ویں سالگرہ کی تقریبات میں شرکت کے بعد واپس ایران کے دارالحکومت تہران پہنچنے پر کیا۔
تہران کے ہوائی اڈے پر گفتگو کرتے ہوئے پزشکیان نے کہا کہ ہم نےایس سی او پلس اجلاس میں حقوق اور انصاف پر مبنی امن پر زور دیا اور چین نے عالمی نظم و نسق کا اقدام تجویز کیا جس میں سچائی اور انصاف پر مبنی اصولوں اور ضوابط کی پاسداری کی بات کی گئی اور دوہرا معیار اختیار نہ کرنے پر زور دیا گیا۔
ایرانی صدر نے شنگھائی تعاون تنظیم کے تحت سلامتی، معیشت اور عوامی روابط جیسے شعبوں میں تعاون بڑھانے سے متعلق 24 مشترکہ دستاویزات کو بھی اجاگر کیا۔ انہوں نے کہا کہ اس دورے کی سب سے اہم کامیابی یہ تھی کہ شرکاء ممالک کے رہنماؤں سے براہ راست گفتگو کا موقع ملا۔