ویب ڈیسک(نیشنل ٹائمز) پاکستان اور آرمینیا نے سفارتی تعلقات کے قیام پر غور کرنے پر اتفاق کرلیا۔
نائب وزیراعظم و وزیر خارجہ اسحاق ڈار اور آرمینیا کے وزیر خارجہ کی ٹیلیفونک گفتگو ہوئی۔ ترجمان دفتر خارجہ نے بتایاکہ پاکستان اور آرمینیا کے وزرائے خارجہ نے سفارتی تعلقات پر بات چیت کی اور دونوں ممالک کے درمیان سفارتی تعلقات کے قیام پر غور کرنے پر اتفاق کیا۔دوسری جانب میڈیا سے گفتگو میں وزیر خارجہ و نائب وزیراعظم اسحاق ڈار نے کہا کہ پاکستان نے آرمینیا سے تعلقات کے قیام پرغور کرنے پراتفاق کیا ہے۔انہوں نے کہا کہ ہم ابھی بھی آذربائیجان کے ساتھ کھڑے ہیں، آذربائیجان اور آرمینیا کے درمیان معاملات حل ہوچکےہیں، جب ان کے آپس میں معاملات درست ہوچکے تو ہمیں کیا مسئلہ ہے؟خیال رہے کہ پاکستان نے آرمینیا کو اب تک بطور ریاست تسلیم نہیں کیا اور نہ ہی اس ملک سے کوئی سفارتی تعلقات ہیں۔گزشتہ دنوں وائٹ ہاؤس میں آذربائیجان کے صدر الہام علیوف اور آرمینیا کے وزیراعظم نیکول پشینیان نے امریکا کے صدر ڈونلڈ ٹرمپ سے ملاقات کی جس میں مکمل جنگ بندی کے معاہدے پر دستخط کیے تھے۔صدر ٹرمپ نے اس پر بطور گواہ دستخط کیے، جس کے بعد آذربائیجان اور آرمینیا کے درمیان مکمل جنگ بندی کا معاہدہ طے پایا۔