واشنگٹن(نیشنل ٹائمز) امریکا میں انگریزی زبان میں مہارت نہ رکھنے والے ٹرک ڈرائیورز کے خلاف کریک ڈاؤن تیز کر دیا گیا۔
امریکی محکمہ ٹرانسپورٹ نے کہا ہے کہ ریاست کیلیفورنیا، واشنگٹن اسٹیٹ اور نیو میکسیکو کو وفاقی فنڈنگ اُس وقت تک نہیں دی جائے گی جب تک یہ ریاستیں کمرشل ٹرک ڈرائیورز کے لیے انگریزی میں مہارت کی لازمی شرط کو نافذ نہیں کرتیں۔امریکی صدر ڈونلڈ ٹرمپ کی انتظامیہ غیر ملکی ٹرک ڈرائیورز کے خلاف سخت اقدامات کر رہی ہے اور گزشتہ ہفتے امریکی وزیر خارجہ مارکو روبیو نے اعلان کیا تھا کہ امریکا فوری طور پر کمرشل ٹرک ڈرائیورز کے لیے تمام ورک ویزا روک رہا ہے۔اپریل میں ٹرمپ نے ایک ایگزیکٹو آرڈر پر دستخط کیے تھے جس کے تحت امریکا میں کمرشل ڈرائیورز کے لیے انگریزی میں مہارت کے قواعد کو نافذ کرنے کی ہدایت دی گئی تھی۔وفاقی حکام کے مطابق پچھلے 2 ماہ میں کم از کم 3 ہزار ٹرک ڈرائیورز کو امریکی سڑکوں سے ہٹا دیا گیا ہے کیونکہ وہ لازمی روڈ سائیڈ انگریزی ٹیسٹ میں ناکام ہوگئے تھے۔ ڈرائیورز کو ہٹانے میں سرفہرست ریاستیں ٹیکساس، ٹینیسی، وائیومنگ، آئیووا اور ایریزونا ہیں، صرف ٹیکساس میں تقریباً 350 ڈرائیورز کو سڑکوں سے ہٹایا گیا۔اس مسئلے نے اس وقت مزید شدت اختیار کرلی جب 12 اگست کو فلوریڈا میں کیلیفورنیا کے لائسنس یافتہ ٹرک ڈرائیور ہر جندر سنگھ پر الزام لگا کہ اُس نے غیر قانونی یو ٹرن لیتے ہوئے ایک منی وین کو کچل دیا جس میں 3 افراد کی ہلاکت ہوئی۔ بعدازاں وہ روڈ سائیڈ انگریزی ٹیسٹ میں بھی ناکام ہوگیا۔ وفاقی حکام نے سوشل میڈیا پر اُسے غیر قانونی تارکِ وطن قرار دیا اور کہا کہ اُسے ہرگز لائسنس نہیں ملنا چاہیے تھا۔