انٹرنیشنل ڈیسک(نیشنل ٹائمز)بھارتی وزیر خارجہ جے شنکر نے ایک بار پھر ڈھٹائی کا مظاہرہ کرتے ہوئے کہا ہے کہ پاکستان کے ساتھ تعلقات میں کسی کی بھی ثالثی قبول نہیں ہے۔
نئی دلی میں اکنامک ٹائمز ورلڈ لیڈرز فورم کی تقریب میں گفتگو کرتے ہوئے بھارتی وزیر خارجہ جے شنکر نے امریکی صدر ڈونلڈ ٹرمپ پر تنقید کرتے ہوئے کہا کہ کوئی ایسا امریکی صدر نہیں دیکھا جس نے خارجہ پالیسی کو عوامی انداز میں چلایا ہو۔بھارتی وزیر خارجہ جے شکنر کا کہنا تھا پاکستان کے ساتھ تعلقات میں کسی ثالثی کو قبول نہیں کرتے۔جے شنکر نے آپریشن سندور کے موقع پر امریکا سے کال کیے جانےکا اعتراف کرتے ہوئے کہا حقیقت ہے اس وقت فون کالیں کی گئیں اور امریکا کی جانب سےکی گئیں، فون کالزدیگر ممالک کی جانب سے بھی کی گئیں، یہ کوئی سیکریٹ نہیں ہے۔بھارتی وزیر خارجہ کا کہنا تھا امریکا کی جانب سے کی گئی ہر فون کال میرے ایکس اکاؤنٹ پر ہے۔یاد رہے کہ بھارت نے مقبوضہ کشمیر کے علاقے پہلگام میں ہونے والے واقعے کو جواز بنا کر پاکستان پر میزائل حملے کیے جس کا پاکستان نے بھرپور جواب دیتے ہوئے ناصرف بھارت کے 6 جنگی طیارے گرائے بلکہ ان کے فضائی دفاعی نظام ایس 400 اور متعدد ائیر بیسز کو بھی تباہ کیا۔امریکی صدر ڈونلڈ ٹرمپ اب تک 27 سے زیادہ مرتبہ پاک بھارت جنگ رکوانے کا کریڈٹ لے چکے ہیں لیکن مودی سرکار نے سے اس حوالے سے اب چپ سادھ رکھی ہے جس پر بھارتی اپوزیشن جماعتیں کی جانب سے بی جے پی کی ہندو انتہا پسند حکومت کو سخت تنقید کا سامنا ہے۔