انٹرنیشنل ڈیسک(نیشنل ٹائمز)دبئی پولیس نے ڈھائی کروڑ امریکی ڈالر مالیت کے نایاب ہیرے کی چوری اور اسمگلنگ کی کوشش کو ناکام بنا دیا۔
اماراتی خبررساں ایجنسی کے مطابق ’پنک ڈائمنڈ آپریشن‘ کے نام سے کی جانے والی اس کارروائی کے دوران پولیس نے ایک بین الاقوامی گروہ کو گرفتار کیا جو گزشتہ ایک سال سے اس قیمتی پنک ڈائمنڈ کو چوری کرنے کی منصوبہ بندی کررہا تھا۔تحقیقات میں یہ بات سامنے آئی کہ ملزمان نے پہلے ہیرے کے مالک کی کھوج لگائی اور پھر خود کو ایک امیر خریدار کا نمائندہ ظاہر کرتے ہوئے مالک کو اعتماد میں لیا۔ ملزمان نے پرتعیش گاڑیاں کرائے پر حاصل کیں، دبئی کے مہنگے ہوٹلوں میں ملاقاتیں طے کیں اور یہاں تک کہ ایک مشہور ہیروں کے ماہر کی خدمات حاصل کیں تاکہ ہیرے کی تصدیق کروا کر خریداری کے لیے اپنی سنجیدگی ظاہر کی جا سکے۔انہی ہتھکنڈوں سے جیولر کو قائل کیا گیا کہ وہ ہیرا اپنی محفوظ دکان سے نکال کر ایک نجی ملاقات میں لے آئے جہاں ملزمان نے موقع پا کر ہیرا چرا لیا اور فرار ہو گئے۔چوری کی اطلاع ملتے ہی پولیس نے ایک خصوصی ٹاسک فورس تشکیل دی اور جدید ٹیکنالوجی اور سرویلنس کے ذریعے تینوں ملزمان، جن کا تعلق ایشیائی ممالک سے بتایا گیا ہے، کی شناخت کی گئی۔ یہ ملزمان واردات کے بعد ایک دوسرے سے الگ ہو کر مختلف مقامات پر منتقل ہو چکے تھے۔پولیس نے بیک وقت مختلف مقامات پر چھاپے مار کر تمام ملزمان کو گرفتار کرلیا اور قیمتی پنک ڈائمنڈ کو بازیاب کر لیا جسے ملزمان ایک چھوٹے ریفریجریٹر میں رکھ کر ایشیائی ملک اسمگل کرنے کی کوشش کر رہے تھے۔خبررساں ایجنسی کے مطابق ہیرا چوری ہونے کی اطلاع ملنے کے بعد پولیس نے 8 گھنٹوں کے اندر ملزمان کو گرفتار کرکے ہیرا بازیاب کرلیا۔