انٹرنیشنل ڈیسک(نیشنل ٹائمز) ابھارت میں ایک شخص نے لفٹ کا دروازہ بند کرنے پر 12 سالہ لڑکے کو تشدد کا نشانہ بنایا۔
بھارتی میڈیا کے مطابق یہ واقعہ ریاست مہاراشٹرا کے علاقے پلیگاؤں ہاؤسنگ سوسائٹی میں پیش آیا جہاں رہائشی عمارت کی لفٹ میں ایک شخص نے کم عمر لڑکے کو تشدد کا نشانہ بنایا جس کی سی سی ٹی وی وائرل ہورہی ہے۔ویڈیو میں دیکھا جاسکتا ہے کہ لفٹ میں لڑکا موجود ہے اور جیسے ہی لفٹ کا دروازہ کھلا تو ایک شخص نے داخل ہوتے ہی لڑکے کو تھپڑ مارنے شروع کردیے جب کہ لفٹ میں موجود خاتون نے بچے کو بچانے کی کوشش بھی کی۔بھارتی میڈیا کو دیے گئے بیان میں متاثرہ لڑکے نے بتایا کہ میں لفٹ سے آ رہا تھا اور لفٹ نویں منزل پر آ کر رک گئی، باہر کوئی نہیں تھا، اس لیے میں نے لفٹ بند کردی، اتنے میں ایک شخص لفٹ کے اندر داخل ہوا اور مجھے مارنا شروع کردیا، مارنے کی وجہ پوچھنے پر اس شخص نے میرے ہاتھ پر کاٹ لیا اور مجھے جان سے مارنے کی دھمکی بھی دی۔دوسری جانب لڑکے کے والد نے تشدد کرنے والے شخص کے خلاف پولیس میں شکایت بھی درج کروائی لیکن والد پولیس کے رویے سے مطمئن نہیں۔میڈیا رپورٹس کے مطابق لڑکے کے والد نے پولیس پر ملزم کو تحفظ فراہم کرنے کا الزام لگایا ہے۔