اسلام آباد(نیشنل ٹائمز) اسپیکر قومی اسمبلی ایاز صادق نے اپنی تنخواہ کے معاملے پر وزیراعظم کو خط لکھ دیا۔
ذرائع کے مطابق اسپیکر قومی اسمبلی اور چیئرمین سینیٹ کی تنخواہ کے معاملے پر وزیر دفاع خواجہ آصف کی کڑی تنقید کے بعد ایاز صادق نے اس معاملے پر وزیراعظم کو خط لکھ ہے۔ذرائع نے بتایا کہ اسپیکر قومی اسمبلی نے اپنی تنخواہ کا معاملہ وزیراعظم پر چھوڑ دیا ہے۔ذرائع کے مطابق خط میں اسپیکر نے مؤقف اپنایا ہےکہ میرا تنخواہوں کے معاملے سے کوئی تعلق ہے اور نہ ہی کوئی دلچسپی ہے، بےشک میری تنخواہ مت بڑھائیں۔ ذرائع اسپیکرآفس کے مطابق تنخواہ بڑھانے کا فیصلہ وفاقی کابینہ اور وزیراعظم کا ہے اسپیکر کا نہیں ہے۔ ذرائع نے مزید بتایا کہ اسپیکر ایاز صادق نے خواجہ آصف کے الزامات کا جواب دینے سے گریز کیا اور مؤقف اختیار کیا کہ اس معاملے پر فیصلہ وزیراعظم کریں گے۔
اسپیکر اور چیئرمین سینیٹ کی تنخواہوں کا معاملہ کیا ہے؟
آئندہ مالی سال کے بجٹ کے بعد پوسٹ بجٹ پریس کانفرنس میں نمائندہ جیونیوز نے چیئرمین سینیٹ اور اسپیکر قومی اسمبلی کی تنخواہوں میں ہوشربا اضافے کا سوال کیا تھا جس پر وزیر خزانہ نے چیئرمین سینیٹ اور اسپیکر کی تنخواہ ڈھائی لاکھ سے بڑھا کر ساڑھے 21 لاکھ کرنے کی وجہ 9 سال سے اضافہ نہ ہونا قرار دیا تھا۔بعدازاں وزیر دفاع خواجہ آصف نے اسپیکر کی تنخواہ ساڑھے 21 لاکھ ہونے پر اسے مالی فحاشی قرار دیا تھا جب کہ وزیراعظم نے بھی اس معاملے کا نوٹس لیا تھا۔چیئرمین سینیٹ اور اسپیکر قومی اسمبلی کی تنخواہوں میں بھاری بھرکم اضافے کے معاملے میں اندرونی کہانی سامنے آئی تھی کہ چیئرمین سینیٹ اور اسپیکر قومی اسمبلی نے اپنی اپنی تنخواہوں میں اضافے کا فیصلہ خود کیا۔ مکمل خبر پڑھیں۔۔