کونمنگ (شِنہوا) چین-لاؤس ریلوے نے رواں سال جنوری سے مئی کے دوران 24 لاکھ80ہزار ٹن سے زائد درآمدی و برآمدی سامان کی ترسیل کی جس کی مجموعی مالیت 10 ارب یوآن (تقریباً 1.4 ارب امریکی ڈالر) سے تجاوز کر گئی۔
کسٹمز کے جمعرات کے روز جاری کردہ اعداد و شمار کے مطابق اس عرصے کے دوران مال برداری کے حجم اور مالیت دونوں میں نمایاں اضافہ ہوا جہاں حجم میں گزشتہ سال کی نسبت 7.9 فیصد اضافہ ہوا جبکہ مالیت میں 33.2 فیصد کا زبردست ا ضافہ ہوا۔
صرف مئی کے مہینے میں ریلوے نے 5 لاکھ 12ہزارٹن سامان منتقل کیاجس کی مالیت 3.76 ارب یوآن رہی جو دسمبر 2021 میں اس ریلوے کے افتتاح کے بعد سے ایک ماہ میں ریکارڈ ترسیل ہے۔
ریلوے کے آغاز کے بعد سے مال بردار ترسیل میں مسلسل مضبوط ترقی ہوئی۔ 22 مئی تک مجموعی ترسیل شدہ مال کاحجم 6کروڑ ٹن سے تجاوز کر چکا تھا جس میں سرحد پار ترسیل 1کروڑ39لاکھ ٹن سے زائد تھی۔
ابتدا میں صرف 10 اقسام کے سامان کی ترسیل کی جاتی تھی لیکن اب یہ دائرہ کار 3 ہزار سے زائد اشیاء پر مشتمل ہے ۔ان میں الیکٹرانکس، فوٹو وولٹک مصنوعات، مواصلاتی آلات، گاڑیاں، زرعی اشیاء، صنعتی سامان اور روزمرہ ضروریات شامل ہیں۔