باکو(شِنہوا)آذربائیجان کے صدارتی دفتر نے اعلان کیا ہے کہ صدر الہام علیوف نے چین کے ساتھ بیلٹ اینڈ روڈ انیشی ایٹو آگے بڑھانے کے لئے تعاون کے منصوبے کی منظوری دے دی ہے۔
صدر الہام علیوف کی جانب سے دستخط کردہ فرمان کے تحت بیلٹ اینڈ روڈ انیشی ایٹو کے فروغ کے لئے آذربائیجان اور چین کے درمیان مشترکہ تعاون کا منصوبہ باضابطہ طور پر منظور کرلیا گیا ہے۔ اس دستاویز میں ان شعبوں کا تعین کیا گیا ہے جہاں دونوں ممالک کے درمیان تجارت اور روابط کو بڑھانے کے لئے تعاون کیا جائے گا۔
حکم نامے کے نفاذ کے بعد آذربائیجان کی وزارت معیشت اس منصوبے پر عملدرآمد کی نگرانی کرے گی جبکہ وزارت خارجہ کو ہدایت کی گئی ہے کہ وہ معاہدے کے نافذالعمل ہونے کا داخلی طریقہ کار مکمل ہونے پر چینی حکومت کو مطلع کرے۔
یہ پیشرفت 23 اپریل کو بیجنگ میں ہونے والی ایک اعلیٰ سطح کی دستخطی تقریب کے بعد ہوئی ہے۔ تعاون کے اس منصوبے پر دستخط کی تقریب میں آذربائیجان کے صدر الہام علیوف اور چینی صدر شی جن پھنگ نے بھی شرکت کی تھی۔