اسلام آباد(نیشنل ٹائمز)ایران اسرائیل کشیدگی کی وجہ سے گزشتہ 6 دن سے بند عراقی فضائی حدود کو بدھ کو محدود سطح تک کھولا گیا ، اس دوران نجف اسلام آباد سمیت مختلف پروازیں آپریٹ کرنا شروع کی گئی ہیں۔
نجف سے اسلام آباد کی شیڈیول پرواز آئی اے 433 کو ہنگامی صورتحال میں بصرہ سے اسلام آباد روانہ کیا گیا۔ اسلام آباد سے یہ پرواز آئی اے 434 نجف کیلئے روانہ ہوئی تاہم اسے ڈائیورٹ کر کے بصرہ اتارا گیا۔ اسی طرح جدہ سے عراقی حاجیوں کو لے کر ایک پرواز بصرہ پہنچی۔ بغداد بیروت کی 4 پروازیں بھی بصرہ سے آپریٹ کی گئیں۔ اس کے علاوہ قاہرہ سے بغداد کی پرواز کو بھی بصرہ ائیرپورٹ لینڈ کرایا گیا۔ بصرہ سے چین کے شہر گونگزو کیلئے بھی عراقی ائیر کی پرواز آپریٹ کی گئی۔