اسلام آباد(نیشنل ٹائمز)اقوام متحدہ کی سلامتی کونسل میں ایران پرحملے پر ہونے والے اجلاس سے خطاب میں عاصم افتخار کا کہنا تھاکہ پاکستان ایران پر اسرائیل کے غیرقانونی حملے کی مذمت کرتاہے۔انہوں نے کہا کہ ایران کو اقوام متحدہ کے چارٹر کے تحت اپنے دفاع کاحق حاصل ہے اور اسرائیلی حملہ ایران کی خودمختاری اور علاقائی سالمیت کی خلاف ورزی ہے۔عاصم افتخار کا کہنا تھاکہ اسرائیلی حملے امن، سلامتی اور استحکام کیلئے سنگین خطرہ ہیں اور اسرائیل کی جانب سے خودمختاری کی مسلسل خلاف ورزیاں معمول بنتی جارہی ہیں۔خیال رہے کہ ایران نے ڈیڑھ سو سے زائد میزائل داغ کر اسرائیل کیخلاف بھرپورجوابی کارروائی کی اور آپریشن وعدہ صادق سوم کے نام سے کی گئی اس کارروائی میں ایک گھنٹے میں تین وقفوں کے ساتھ ڈیڑھ سو سے 2 سو میزائل اسرائیل پر داغے گئےپہلے حملےمیں 100 اور دوسرے وار میں پچاس میزائل داغے گئے جبکہ تیسرے حملے میں بھی تقریباً پچاس میزائل داغے۔ پاسداران انقلاب کے کمانڈر کادعویٰ ہے کہ ایران نے اسرائیل میں ڈیڑھ سو سےزائد اہداف کو نشانہ بنایا ہے، ان حملوں سے اسرائیل کا دارالحکومت دھماکوں کی آوازوں سے گونج اٹھا۔ اسرائیل کے میزائل دفاعی نظام نے امریکا کی مدد سے کئی ایرانی میزائل فضا میں تباہ کیے مگرکئی ایرانی میزائل تل ابیب میں مختلف اہداف پر گرے جن اہداف کو نشانہ بنایا گیا ان میں سے ایک میزائل اسرائیل کی وزارت دفاع پر بھی مارا گیا۔ مجموعی طور پر کم سے کم نو اہداف پر میزائلوں سے حملے کیے گئے ہیں۔ایرانی میڈیا کے مطابق جن اہداف کو کامیابی سے نشانہ بنایا گیا ان میں اسرائیل کے فوجی اڈے، قومی سلامتی کی وزارت بھی شامل ہے، ایرانی حملوں میں کم سے کم 63 افرادزخمی ہونے کی تصدیق کی گئی ہے جن میں سے 2 کی حالت نازک بتائی گئی ہے۔ ایرانی خفیہ ایجنسی کے مطابق نیواتم ائیربیس پر حملے میں کئی اسرائیلی فوجی زخمی ہوئے۔