اسلام آباد(نیشنل ٹائمز) صدر مملکت آصف علی زرداری نے یومِ تکبیر کے موقع پر قوم کو دلی مبارکباد پیش کرتے ہوئے کہا ہے کہ 28 مئی پاکستان کی تاریخ کا ایک سنہری دن ہے، جب ہم نے اپنی جوہری صلاحیت کا مظاہرہ کر کے تزویراتی دفاعی طاقت حاصل کی۔

صدر مملکت نے اپنے پیغام میں کہا کہ آج کا دن ملکی خودمختاری، آزادی اور علاقائی سالمیت کے تحفظ کے عزم کی تجدید کا دن ہے۔ انہوں نے ایٹمی پروگرام سے وابستہ تمام سائنسدانوں، انجینئرز، سول و عسکری قیادت کو خراجِ تحسین پیش کیا۔

انہوں نے کہا کہ پاکستان کے ایٹمی پروگرام کی بنیاد رکھنے پر شہید ذوالفقار علی بھٹو کو سلام پیش کرتے ہیں، جبکہ محترمہ بے نظیر بھٹو کی سرپرستی میں اس پروگرام کو مزید وسعت اور مضبوطی ملی۔ ان کا کہنا تھا کہ ایٹمی طاقت بننا محض تکنیکی ترقی کا اظہار نہیں بلکہ ایک دانشمندانہ اور دور اندیش فیصلہ تھا تاکہ خطے میں امن قائم رکھا جا سکے۔

صدر زرداری نے کہا کہ بدلتی ہوئی علاقائی سکیورٹی صورتحال کے پیش نظر پاکستان کی جوہری صلاحیت ایک قابل اعتبار کم از کم دفاعی صلاحیت ہے، جو ملکی دفاع کو ناقابل تسخیر بناتی ہے۔

انہوں نے واضح کیا کہ پاکستان جنگ کا خواہاں نہیں بلکہ پرامن بقائے باہمی، عالمی قوانین اور اقوامِ متحدہ کے چارٹر کے اصولوں پر کاربند ہے۔ حالیہ بھارتی جارحیت کا ذکر کرتے ہوئے انہوں نے کہا کہ پاکستان نے تزویراتی تحمل اور امن کے عزم کا مظاہرہ کیا، اور آپریشن بُنیانُ مَّرصوص کے تحت نپے تلے مؤثر ردِعمل نے دشمن کو اپنی معاندانہ کارروائیاں بند کرنے پر مجبور کیا۔

آخر میں صدر مملکت نے قوم سے اپیل کی کہ یومِ تکبیر پر ہم سب ایک بار پھر یہ عہد کریں کہ ملکی خودمختاری اور علاقائی سالمیت کے تحفظ کے لیے ہر قربانی دیں گے۔