بیجنگ (شِنہوا) چین نے جاپان کی جانب سے تائیوان جزیرے کے اطراف چین کی مشترکہ مشقوں سےمتعلق نام نہاد تشویش کو مسترد کر تے ہوئے کہا ہے کہ جاپان کے الفاظ اور اقدامات واضح طور پر ایک چین اصول کے منافی ہیں۔
وزارت خارجہ کے ترجمان گو جیاکن نے ایک پریس بریفنگ میں کہا کہ چینی پیپلز لبریشن آرمی کے ایسٹرن تھیٹر کمانڈ کی مشقیں “تائیوان کی آزادی” کی علیحدگی پسند قوتوں کو خبردار کرنے اور انہیں روکنے کے لئے ہیں اور یہ چین کی قومی خودمختاری کے دفاع اور قومی اتحاد کو برقرار رکھنے کے لئے ایک جائز اور ضروری اقدام ہے۔
ایک میڈیا کے سوال کے جواب میں انہوں نے کہا کہ جاپان کو اس پر سوال اٹھانے اور اس میں مداخلت کا کوئی حق نہیں ہے ۔ ان سے میڈیا رپورٹس سے متعلق پوچھا گیا تھا جس میں جاپان نے مشقوں کے بارے میں چین سے سفارتی ذرائع سے اپنی تشویش ظاہر کی تھی۔
گو نے کہا کہ چین نے شدید عدم اطمینان اور سخت مخالفت کرتے ہوئے جاپان سے شدید احتجاج کیا ہے، تائیوان چینی سرزمین کا لازمی حصہ ہے اور تائیوان معاملہ چین کے بنیادی مفادات کا محور ہے اور یہ چین۔جاپان تعلقات کی سیاسی بنیاد اور دونوں ممالک کے باہمی اعتماد پر اثر انداز ہوتا ہے۔