اسلام آباد(نیشنل ٹائمز) سعودی عرب کا تاریخی شہر طائف جہاں نبی کریم صلی اللہ علیہ وسلم نے اللہ کا پیغام پہنچانےکیلئے سختیاں برداشت کیں، مکہ سے تقریباً40 میل کے فاصلے پر خوبصورت وادی، زرخیز باغات اور پہاڑی سلسلے پر مشتمل طائف کا علاقہ ہے۔خوبصورت راہداریوں کے ساتھ پہاڑوں کے دامن میں کئی خوبصورت ریسٹورینٹ ، کیمپنگ اور تفریحی سرگرمیوں کے مقامات سیاحوں کیلئے کشش رکھتے ہیں جہاں عرب ثقافت کو اجاگر کرنے کیلئے امور خانہ داری کے قدیم طریقہ کار کی عکاسی بھی کی جاتی ہے۔طائف کی مشہور القریش روز فیکٹری قبیلہ قریش کے لوگوں نے قائم کی ہے، انتہائی خوشبودار پھولوں سے حاصل عرق سے خاص پرفیوم ، کریم اور لوشن تیار کیے جاتے ہیں جو اب تک صرف شاہی خاندان کے زیراستعمال یا حکومتی تحائف کے طور پر استعمال ہوتے ہیں، فیکٹری میں مخصوص پرانے طریقے سے پھولوں کاعرق نکالا جاتا تھا۔نمائندہ سعودی ٹورزم اتھارٹی ڈاکٹر عماد کشمیری کے مطابق ولی عہد محمد بن سلمان کے وژن 2030 کے تحت اب فیکٹری کی مصنوعات کو مارکیٹ میں فروغ دیا جائے گا جس کیلئے نیا پلانٹ بھی لگایا جائے گا اور مالی و فنی معاونت بھی فراہم کی جائے گی ۔طائف میں اہم تاریخی مقامات میں مسجد عباس اور اس کے قریب وہ مقام بھی ہے جہاں دیوار طائف تھی ، عرب سرداروں کو دین اسلام کی دعوت دینے پر نبی کریم صلی اللہ علیہ وسلم کو اس مقام پر اوباش اور آوارہ نوجوانوں نے پتھروں سے لہولہان کیا ۔جبرائیل علیہ السلام کے اجازت طلب کرنے پر بھی آپ نے پہاڑوں کے درمیان طائف کے لوگوں کو پیسنے کی اجازت نہ دی بلکہ ان کے حق میں دعا فرمائی ، اب اس جگہ پر رونق بازار قائم ہے۔