اسلام آباد(نیشنل ٹائمز)فلسطینی مزاحمتی تنظیموں نے آج جنگ بندی معاہدے کے تحت مجموعی طور پر 8 یرغمالی رہا کیے۔یرغمالیوں کو رہا کرنے کی پہلی تقریب شمالی غزہ میں جبالیہ کیمپ میں ہوئی جہاں القسام بریگیڈز نے ایک خاتون اسرائیلی فوجی کو رہا کیا۔یرغمالیوں کی رہائی کی دوسری تقریب جنوبی غزہ میں خان یونس میں ہوئی جہاں ایک اسرائیلی خاتون اور ایک مرد کو رہا کیا گیا جبکہ ان کے ساتھ ہی 5 تھائی باشندے بھی رہا کیے گئے۔عرب میڈیا کے مطابق فلسطینی مزاحمتی تنظیموں نے خان یونس کے علاقے میں حماس کے شہید سربراہ یحییٰ سنوار کے تباہ شدہ مکان کے سامنے یرغمالیوں کو ریڈ کراس کے حوالے کیا۔خان یونس میں یحییٰ سنوار کا مکان اسرائیلی بمباری میں تباہ ہوچکا ہے، یرغمالیوں کی رہائی کی تصاویر اور ویڈیوز میں دیکھا جاسکتا ہے کہ یحییٰ سنوار کے مکان کے ملبے پر ایک بینر بھی آویزاں ہے جس پر یحییٰ سنوار کی تصویر موجود ہے۔