اسلام آباد (نیشنل ٹائمز) امریکی موسمیاتی اداروں نے بتایا ہے کہ جنوب مشرقی کیریبین کی طرف بڑھتا ہوا سمندری طوفان ‘بیرل’ اتوار کو تیسرے درجے کے “بہت خطرناک” طوفان میں تبدیل ہوگیا۔ یہ اس سال ‘اٹلانٹک سیزن’ میں آنے والا پہلا سمندری طوفان ہے۔
امریکہ کے ‘نیشنل ہریکین سینٹر’ کے مطابق اٹلانٹک سیزن سے مراد یکم جون سے 30 نومبر کے درمیان کا وہ عرصہ ہے جس میں بحر اوقیانوس میں طوفان آنے کے امکانات ہوتے ہیں۔
بیرل کے بارے میں پیش گوئی کی گئی ہے کہ یہ متاثرہ علاقوں میں ہواؤں کی رفتار میں اس قدر تیزی اور سطح سمندر میں اس حد تک اضافے کا باعث بن سکتا ہے کہ ان سے جان کو خطرہ ہو۔
نیشنل ہریکین سینٹر نے اپنے انتباہ میں کہا ہے کہ متوقع طور پر اس طوفان کا مرکز (طوفان کی آنکھ) پیر کو ونڈورڈ جزائر سے گزرے گا۔
اس میں مزید کہا گیا ہے کہ بیرل کی شدت میں تیزی سے اضافہ ہو رہا ہے، جس سے اس بات کا اندیشہ ہے کہ یہ ونڈورڈ جزائر تک پہنچنے پہنچتے چوتھے درجے کے “انتہائی خطرناک” طوفان میں تبدیل ہو چکا ہو گا۔
دریں اثناء، بارباڈوس کے دارالحکومت برج ٹاؤن میں گیس اسٹیشنز پر گاڑیوں کی قطاریں دیکھی گئیں۔ بازاروں میں بھی لوگوں کا رش رہا، جو متوقع ہنگامی صورتحال کے پیش نظر اشیا خورونوش اور ضرورت کا دیگر سامان خریدتے نظر آئے۔
بارباڈوس کے علاوہ سینٹ لوسیا، سینٹ ونسینٹ، گریناڈائنز، گریناڈا اور ٹوباگو میں بھی طوفان سے متعلق انتباہ بھی جاری کر دیا گیا ہے۔
