تل ابیب(نیشنل ٹائمز) اسرائیلی وزیر دفاع گیلنٹ نے کہا ہے کہ ان کی سینئر امریکی حکام کے ساتھ واشنگٹن میں ملاقات غزہ کی پٹی میں جنگ کے مستقبل کے لیے فیصلہ کن ثابت ہو گی۔ واشنگٹن روانگی سے قبل انہوں نے کہا کہ وہ لبنانی سرحد کے ساتھ شمالی محاذ پر واشنگٹن کی پیش رفت پر بھی بات کریں گے۔گیلنٹ نے کہا کہ غزہ، لبنان یا کسی بھی علاقے میں ضرورت پڑنے پر کارروائی کے لیے تل ابیب کی تیاری مکمل ہے۔ اسرائیلی میڈیا کے مطابق گیلنٹ کی واشنگٹن کے دورے کے دوران امریکی وزیر خارجہ بلنکن، امریکی وزیر دفاع لائیڈ آسٹن، سی آئی اے کے ڈائریکٹر ولیم برنز اور خصوصی ایلچی آموس سے ملاقات متوقع ہے۔ ان کا یہ دورہ منگل کو ختم ہوگا۔ عرب میڈیا کے مطابق گیلنٹ کے دورے کا بنیادی مقصد امریکہ پر دبائو ڈالنا ہے کہ وہ بھاری بموں کی کھیپ کی اسرائیل کو فراہمی کو منجمد نہ کرے۔