مدینہ منورہ /دبئی/تہران/ لندن (نیشنل ٹائمز) سعودی عرب اور خلیجی ممالک میں اتوار کے روز عیدالاضحی مذہبی عقیدت و احترام سے منائی گئی۔ مسجد نبوی ؐمیں نماز عید کا روح پرور اجتماع ہوا، لاکھوں کی تعداد میں فرزند اسلام نے مسجدنبویؐ میں عیدالاضحی کی نماز ادا کی۔حجاج کرام و شہریوں نے نماز عید کی ادائیگی کے بعد سنت ابراہیمی کی ادائیگی کی، ایران اور عراق میں بھی عید الاضحی روایتی جوش و خروش کے ساتھ منائی گئی۔دوسری جانب پاکستان سمیت بھارت اور عمان میں عید الاضحی(آج) پیر کو منائی جارہی ہے، امریکا،کینیڈا میں اس بار بھی دو عیدیں منائی جائیں گی، مسلم کمیونٹی کے بعض افراد نے اتوار کو جبکہ بعض افراد (آج) عید منائیں گے۔ ادھر پاکستان میں بوہرہ برادری نے بھی اتوار کے روز عیدالاضحی منائی۔ کراچی میں صدر کی طاہری مسجد میں عیدالاضحی کی نماز ادا کی گئی جبکہ پشاور میں افغان باشندوں نے بھی عید الاضحی منا ئی پشاور کے علاقے تاج آباد میں عید کی نماز ادا کی گئی، نماز عید میں بڑی تعداد میں افغان باشندے شریک ہوئے اور سنتِ ابراہیمی کی پیروی کرتے ہوئے جانوروں کی قربانی کی۔