انقرہ(نیشنل ٹائمز) ترکیہ کے صدر رجب طیب اردگان نے کہا ہے کہ ترکیہ میں تمباکو نوش افراد کی تعداد میں جزوی کمی کا واقع ہونا خوش آئند ہے ۔انسداد تمباکو نوشی کے عالمی دن کی مناسبت سے نوجوانوں سے خطاب کے دوران صدر اردگان نے کہا کہ دنیا میں ہر روز 20ہزار افراد تمباکو نوشی سے متعلقہ امراض میں مبتلا ہوکر جان دے دیتے ہیں، ترکیہ میں ہر سال 85ہزار کے قریب افراد تمباکو نوشی کے باعث جان سے ہاتھ دھو بیٹھتے ہیں ، ترک صدر نے کہا کہ دنیا میں بچوں کی نصف تعداد تمباکو نوشی کے مضر اثرات کا شکار ہو رہے ہیں،سگریٹ کے دھویں میں 4ہزار سے زیادہ مضرصحت کیمیائی اجزا موجود ہوتے ہیں جنہیں تمباکو نوش فضا میں پھیلانے کا سبب بنتے ہیں اور جو تمباکو کا استعمال نہیں کرتے وہ اس ہوا میں سانس لینے کی وجہ سے زیادہ متاثر ہوتے ہیں، قابل توجہ بات تو یہ ہے کہ تمباکو نوشی کے تمام منفی اورنقصان دہ اثرات کے باوجود تمباکو ساز صنعتیں ہر سال 700ارب ڈالر کا منافع کما رہی ہیں۔صدر نے مزید کہا کہ ترکیہ میں تمباکو نوش افراد کی تعداد میں جزوی کمی ضرور ہوئی ہے جو کہ خوش آئند ہے ۔