ملتان (نیشنل ٹائمز )ملتان میں قومی اسمبلی کی نشست این اے 148 پر ہونے والے ضمنی انتخاب میں ووٹوں کی گنتی جاری رہا اور موصول ہونے والے غیرحتمی اور غیرسرکاری نتائج میں پیپلز پارٹی کے علی قاسم گیلانی کو واضح برتری حاصل ہے۔میڈیا رپورٹس کے مطابق ملتان میں قومی اسمبلی کے حلقہ این اے 148 میں صبح آٹھ بجے شروع ہونے والی پولنگ کسی وقفے کے بغیر شام پانچ بجے تک جاری رہی۔حلقے میں آٹھ امیدوار میدان میں تھے تاہم سب سے سخت مقابلہ حسب توقع حکمران اتحاد کے حمایت یافتہ پیپلز پارٹی کے امیدوار علی قاسم گیلانی اور پی ٹی آئی کے حمایت یافتہ سنی اتحادی کونسل کے امیدوار تیمور الطاف میں ہوا۔اس سے قبل پیپلز پارٹی کے امیدوار قاسم گیلانی کا پولنگ کے دوران پولنگ سٹیشن کا دورہ کیا۔پولنگ کے عمل کے دوران علی قاسم گیلانی نے پولنگ سٹیشن کا دورہ کیا اور الیکشن کے عمل پر اطمینان کا اظہار کیا۔علی قاسم گیلانی نے کہا کہ پرامن الیکشن ہوا اور ہم مطمئن ہیں، شہری علاقے کی نسبت دیہاتی علاقوں میں ٹرن آئوٹ بہتر نظر آرہا ہے۔
تمام حلقوں کے غیر حتمی اور غیر سرکاری نتائج کے مطابق پیپلزپارٹی کے علی قاسم گیلانی 85850ووٹ لے کر کامیاب رہے جبکہ ان کے مد مقابل سنی اتحاد کونسل کے بیرسٹر تیمور الطاف ملک 53449 ووٹ لے کر دوسرے نمبر پر رہے۔
پیپلز پارٹی کے کارکن جشن منانے کے لئے گیلانی ہائوس پہنچ گئے۔8 فروری کو ہونے والے عام انتخابات میں سابق وزیر اعظم یوسف رضا گیلانی نے تیمور الطاف ملک کو شکست دی تھی لیکن چیئرمین سینیٹ منتخب ہونے کے بعد یوسف رضا گیلانی نے قومی اسمبلی کی رکنیت چھوڑ دی تھی۔
