اسلام آباد (آئی این پی )وزیرِ اعظم محمد شہباز شریف نے کرغزستان میں پاکستانی طلبہ کے ریسکیو اور ان کو مدد و معاونت فراہم کرنے کیلئےنائب وزیراعظم اسحاق ڈار اور وفاقی وزیر انجینئر امیر مقام کو فوری بشکیک جانے کی ہدایت کر دی۔نائب وزیراعظم اور وفاقی وزیر برائے امورِ کشمیر، گلگت بلتستان و سرحدی علاقہ جات فوری بشکیک روانہ ہوں گے، امیر مقام بشکیک میں غیر ملکی طلبہ مخالف حالیہ فسادات کے تناظر میں اعلی سرکاری حکام سے ملاقات کریں گے۔انجینئر امیر مقام پاکستانی طلبہ سے ملاقات کریں گے، ان کے مسائل سنیں گے اور یقینی بنائیں گے کہ حالیہ صورتحال میں پاکستانی طلباء کو کسی قسم کی مشکلات کا سامنا نہ کرنا پڑے۔ وزیر اعظم کا کہنا تھا کہ کرغزستان میں غیر ملکی طلبہ مخالف فسادات پر گہری تشویش ہوئی، شہباز شریف نے زخمی پاکستانی طلبہ کو سفارتخانے کی جانب سے علاج معالجے کی بہترین سہولیات میں معاونت یقینی بنائی جائے۔انہوں نے کہا کہ مشکل وقت میں پاکستان کے بیٹے اور بیٹیوں کو اکیلا نہیں چھوڑیں گے، جو طلبہ پاکستان واپس آنا چاہیں، حکومتی اہلکار سرکاری خرچ پر ان کی فوری واپسی یقینی بنائیں۔وزیرِ اعظم شہباز شریف نے ہدایت کی کہ طلبہ اور والدین کے مابین روابط کو مسلسل برقرار رکھنے کیلئے سفارتخانہ ہر قسم کی معاونت فراہم کرے۔