بیجنگ (نیشنل ٹائمز )نائب وزیرِ اعظم اور وزیر خارجہ سینیٹر اسحاق ڈار نے بیجنگ میں عوامی جمہوریہ چین کے وزیرِ خزانہ سے ملاقات کی ہے ۔اسحاق ڈار اور چینی وزیرِ خزانہ نے پاک چین مالیاتی اور بینکنگ تعاون کو سراہتے ہوئے اسے دونوں ممالک کے درمیان آل ویدر اسٹریٹجک کوآپریٹو پارٹنرشپ کا مظہر قرار دیا۔انہوں نے خاص طور پر پاکستان اور چین کے درمیان بڑھتے ہوئے بزنس ٹو بزنس روابط کے پیش نظر مالی تعاون کو مزید بڑھانے پر تبادلہ خیال کیا۔اس موقع پر پاکستان کی معیشت کی مثبت رفتار کا نوٹس لیتے ہوئے چینی وزیرِ خزانہ نے پاکستان کے اقتصادی ایجنڈے کو سراہتے ہوئے مالی استحکام کو مضبوط بنانے کی کوششوں میں چین کی پاکستان کی حمایت جاری رکھنے کا اعادہ کیا۔ چینی وزیرِ خزانہ نے پاکستان اور چین کے درمیان مالیاتی اور بینکنگ تعاون کو مزید گہرا کرنے میں نائب وزیرِ اعظم اسحاق ڈار کے تعاون کو بھی سراہا۔ملاقات میں وزیرِ خارجہ اسحاق ڈار نے براہ راست غیر ملکی سرمایہ کاری کو راغب کرنے کے لیے گورننس، ریونیو اور کاروبار کرنے میں آسانی پر حکومت پاکستان کے اصلاحاتی ایجنڈے پر روشنی ڈالی۔اسحاق ڈار نے چین سے سرمایہ کاری کے حوالے سے پاکستان کی اعلی ترجیح پر بھی زور دیا۔ملاقات میں سرمایہ کاری کے حوالے سے جن ترجیحی شعبوں کی نشاندہی کی گئی، ان میں زراعت، آئی ٹی، معدنیات اور قابل تجدید توانائی شامل ہیں۔