اسلام آباد (نیشنل ٹائمز) وزیراعظم شہباز شریف سے چیئرمین پیپلز پارٹی بلاول بھٹو زرداری نے ملاقات کی ہے ۔ملاقات میں ملک کی مجموعی سیاسی صورتحال پر تبادلہ خیال اور پنجاب اور خیبرپختونخوا کے گورنرز کی تعیناتی پر مشاورت کی گئی وزیراعظم شہباز شریف نے پنجاب اور خیبرپختونخوا کے گورنرز کے نام جلد اپنی ایڈوائس کے ساتھ صدر کو بھجوانے کی یقین دہانی کرا دی۔تفصیل کے مطابق جمعہ کے روز و وزیراعظم شہباز شریف سے چیئرمین پیپلز پارٹی بلاول بھٹو زرداری نے ملاقات کی۔ ملاقات میں ملک کی مجموعی سیاسی صورتحال پر تفصیلی تبادلہ خیال کیا گیا۔ذرائع کے مطابق ملاقات میں پنجاب اور خیبرپختونخوا کے گورنرز کی تعیناتی پر مشاورت بھی کی گئی۔ بلاول بھٹو نے وزیراعظم کو سردار سلیم حیدر کی بطور گورنر پنجاب نامزدگی سے آگاہ کیا۔ ذرائع کے مطابق وزیراعظم شہباز شریف نے پنجاب اور خیبرپختونخوا کے گورنرز کے نام جلد اپنی ایڈوائس کے ساتھ صدر کو بھجوانے کی یقین دہانی کرا دی۔