اسلام آباد (نیشنل ٹائمز)پاکستان نے افغانستان کے شہر ہرات میں دہشت گردی کے واقعہ کی شدید مذمت کرتے ہوئے کہا ہے کہ دہشتگردی کی تمام شکلوں اور مظاہر کی مذمت کرتے ہیں۔ترجمان دفتر خارجہ ممتاز زہرا بلوچ نے جاری بیان میں کہا ہے کہ پاکستان ہرات میں مسجد پر ہونے والے دہشت گردانہ حملے کی سخت ترین الفاظ میں مذمت کرتا ہے اورحملے کے نتیجے میں جانی اور مالی نقصان پر پاکستانی عوام اور حکومت افغانستان کے عوام سے دلی تعزیت کا اظہار کرتے ہیں۔ممتاز زہرا بلوچ کا مزید کہنا تھا کہ دکھ کی اس گھڑی میں ہماری ہمدردیاں اور دعائیں متاثرین اور ان کے اہل خانہ کے ساتھ ہیں، پاکستان عبادت گاہوں پر نفرت انگیز حملوں سمیت دہشت گردی کی تمام شکلوں اور مظاہر کی مذمت کرتا ہے۔ واضح رہے کہ افغانستان کے صوبے ہرات میں مسلح افراد کی جانب سے مسجد پر حملہ کیا گیا تھا جس کے نتیجے میں 6 افراد شہید ہوئے تھے۔