لاہور ( نیشنل ٹائمز) پنجاب میں روٹی کی قیمت میں کمی کردی گئی، وزیر اعلی پنجاب مریم نواز نے صوبے میں روٹی کی قیمتیں میں کمی کا اعلان کیا۔

تفصیلات کے مطابق اپنے ایک بیان میں وزیراعلیٰ پنجاب مریم نواز نے کہا ہے کہ پنجاب حکومت نے روٹی کی قیمت کم کرکے 16روپے مقرر کردی ہے، اس حوالے سے پنجاب کے تمام اضلاع اور متعلقہ محکموں کو ہدایت جاری کردی ہیں، اس فیصلے پر سختی سے عمل درآمد کو یقینی بنانے کی ہدایت کی گئی ہے۔ بتایا جارہا ہے کہ صوبہ پنجاب میں 20 کلو آٹے کا تھیلا 500 روپے کی کمی کے بعد 2800 روپے سے کم ہو کر2300 روپے کا ہوچکا ہے، اس حوالے سے چیئرمین پاکستان فلور ملز ایسوسی ایشن عاصم رضا نے بتایا کہ گندم کی قیمت میں کمی کی وجہ سے آٹے کے 20 کلو تھیلے کی قیمت میں کمی آئی ہے جب کہ منڈیوں میں پنجاب کی نئی گندم بھی آنا شروع ہو چکی ہے جس کے بعد 20 کلو آٹے کے تھیلے میں تقریباً 300 روپے مزید کمی متوقع ہے۔

دوسری طرف پنجاب میں گندم خریداری مہم 2024/25ء کا آغاز ہو گیا، پنجاب حکومت نے کاشتکاروں کو گندم کی قیمت کے علاوہ ڈلیوری چارجز ادا کرنے کا فیصلہ کرلیا ہے، ترجمان محکمہ خوراک کا کہنا ہے کہ ہر کاشتکار کو 30 روپے فی 100 کلوگرام ڈلیوری چارجز ادا کیے جائیں گے، گندم 3900 روپے فی 40 کلو مقررہ قیمت پر خریدی جائے گی جب کہ کاشتکار باردانہ ایپ کے ذریعے باردانہ کے حصول کی درخواستیں بھی دے سکتے ہیں، پنجاب انفارمیشن ٹیکنالوجی بورڈ کی باردانہ ایپ پر 13 سے 17 اپریل تک باردانہ کی درخواستیں موصول کی جائیں گی، پی آئی ٹی بی اور پنجاب لینڈ ریکارڈ اتھارٹی کی تصدیق کے بعد کاشتکاروں کو تصدیقی میسج کیا جائے گا، کاشتکاروں کو باردانہ کے اجراء اور گندم وصولی کی تاریخ کا میسج بزریعہ باردانہ ایپ کیا جائے گا، ایپ پر موصول درخواستوں کے مطابق باردانہ کا اجراء 19 اپریل 2024 سے ہوگا جبکہ باردانہ پہلے آئیں پہلے پائیں کی بنیاد پر دیا جائے گا۔