کراچی (نیشنل ٹائمز) چیئرمین پیپلز پارٹی بلاول بھٹو زرداری نے کہا ہے کہ عوام کے مسائل کا حل ہماری ترجیح ہے، انتخابات میں مینڈیٹ دینے پر عوام کے شکر گزار ہیں۔
بلاول بھٹو زرداری کا کہنا ہے کہ مسائل کے حل میں منتخب نمائندوں کا اہم کردار ہے۔ منتخب نمائندے عوامی ضرورتوں کے مطابق مشاورت سے منصوبے ترتیب دیں۔ انتخابات میں مینڈیٹ دینے پر عوام کے شکر گزار ہیں۔ تمام اداروں کو آئینی دائرے میں رہ کر کام کرنا ہے۔

انہوں نے کہا کہ اس وقت عوامی مسائل کے حل کی طرف توجہ دینے کی اشد ضرورت ہے، عوامی مسائل کے حل کیلئے حکومت کا ساتھ دے رہے ہیں، پارلیمان میں سیاست دانوں کے رویئے پر افسوس ہوتا ہے۔ اپوزیشن کے ساتھی کو اپنی ذمہ داری کا احساس ہونا چاہئے۔ سیاسی مفاہمت کیلئے بھی بھرپور کردار ادا کریں گے، امید ہے منتخب نمائندے مثبت کردار ادا کریں گے۔
ان کا مزید کہنا تھا کہ ذاتی انا، تقسیم اور منافرت کی سیاست مسائل کا حل نہیں۔ عوام نے ووٹ کے ذریعے پیغام دیا کہ تمام جماعتیں مل کر کام کریں۔ عوام کے مسائل کا حل ہماری ترجیح ہے۔ پیپلز پارٹی عوام کے سیاسی ، معاشی اور آئینی حقوق کی جدوجہد جاری رکھے گی۔