اسلام آباد (نیشنل ٹائمز)وزیر دفاع خواجہ آصف کا کہنا ہے کہ دہشتگردی کے واقعات میں اضافے کے پیش نظر بارڈر کی صورتحال میں بنیادی تبدیلی کی ضرورت ہے،پاکستان میں ہونے والی دہشتگردی کا منبع افغانستان میں ہے۔

اپنے بیان میں ان کا مزید کہنا تھا کہ ہماری کوششوں کے باوجود کابل اس سمت میں کوئی پیش رفت نہیں کر رہا، دہشتگردی کے ٹھکانے ان کے علم میں ہونے کے باوجود ان کی سر زمین سے پاکستان کے خلاف آزادانہ آپریٹ کر رہے ہیں،پاک افغان بارڈر ساری دنیا کےروایتی بارڈر سے مختلف ہے،موجودہ حالات میں پاکستان کو کابل سے تعاون میسر نہیں، پاکستان کو اس بارڈر پر تمام بین الاقوامی قوانین اور روایت نافذ کرنا ہونگے۔ان کا مزید کہنا تھا کہ دہشتگردوں کی ٹریفک ختم کرنا ہوگی،اس طرح دونوں ممالک روایتی اچھے ہمسائیوں کی طرح اپنے تعلقات کو فروغ دے سکتے ہیں،پاسپورٹ اور ویزہ کے ذریعے سفر کی سہولتیں جاری رکھی جاسکتی ہیں۔