اسلام آباد (نیشنل ٹائمز) پاکستان تحریک انصاف کے چیئرمین بیرسٹر گوہر علی خان کا سینیٹر فیصل واوڈا کے فارورڈ بلاک کے دعوے پر ردعمل آگیا۔ اسلام آباد میں میڈیا سے گفتگو کرتے ہوئے انہوں نے کہا کہ تحریک انصاف متحد ہے اور کوئی فارورڈ بلاک نہیں ہے، تین سے چار ممبر ہمارے رابطے میں نہیں ہیں، ہم نے ایسا نہیں کہا ہمارے ممبر حکومت کو ووٹ دیں گے، ہم نے صرف یہ کہا ہے ممبر ہمارے رابطے میں نہیں ہیں۔
اسی معاملے پر پی ٹی آئی کے رکن قومی اسمبلی عامر ڈوگر نے کہا کہ جب بھی فارورڈ بلاک بنا اس کا عبرت ناک انجام ہوا، پرویز خٹک اور جہانگر ترین کی شکل میں اس کا انجام سب کے سامنے ہے، ہمارا چند ارکان سے رابطہ نہیں ہورہا، سیاسی کمیٹی نے فیصلہ کیا تھا ہم آئینی ترمیم پر رائے شماری کے عمل کا بائیکاٹ کریں گے، جس نے بھی مشکل وقت میں بانی پی ٹی آئی کو چھوڑا اس کا تاریخ میں عبرت ناک انجام ہوا۔
پی ٹی آئی سیاسی کمیٹی کے خصوصی اجلاس کے اعلامیہ میں کہا گیا کہ پارٹی پالیسی کی خلاف ورزی کرتے ہوئے رائے شماری میں حصہ لینے والے اراکینِ قومی اسمبلی اور سینٹ کے خلاف احتجاج کیا جائے گا، مینڈیٹ چور سرکار اور اس کے سرپرست آئین میں ترامیم کے ذریعے ملک میں جنگل کے قانون کو نافذ کرنا اور جمہوریت کو زندہ درگور کرنا ہے، پارٹی پالیسی کی خلاف ورزی کرتے ہوئے رائے شماری میں حصہ لینے والے تحریک انصاف کے اراکینِ قومی اسمبلی اور سینٹ کے خلاف بھرپور احتجاج کا فیصلہ کیا گیا، تحریک انصاف کے کارکن پارٹی پالیسی سے روگردانی کرتے ہوئے سینٹ یا قومی اسمبلی میں کسی بھی انداز میں رائے شماری میں حصہ لینے والے اراکین کی رہائشگاہوں کے باہر پرامن دھرنے دیں گے۔
