اسلام آباد (نیشنل ٹائمز) کراچی میں ایئرپورٹ کے قریب دھماکے کے بعد وفاقی وزیرداخلہ محسن نقوی چینی سفارت خانے پہنچ گئے۔ تفصیلات کے مطابق وفاقی وزیرداخلہ محسن نقوی نے چین کے سفیر جیانگ زی ڈونگ سے ملاقات کی جہاں انہوں نے چینی سفیر کے ساتھ کراچی دھماکے میں 2 چینی شہریوں کے ہلاک ہونے کے واقعہ پر گہرے دکھ اور افسوس کا اظہار کیا، وزیرداخلہ نے چین کے سفیر، حکومت اور ہلاک چینی شہریوں کے خاندانوں کے ساتھ مکمل یکجہتی کا اظہار کیا، محسن نقوی نے چینی سفیر کو دھماکے کی تمام تفصیلات اور تحقیقات میں پیشرفت کے بارے میں بھی آگاہ کیا۔
بتایا گیا ہے کہ وفاقی وزیرداخلہ محسن نقوی نے کراچی میں ائیرپورٹ سگنل کے قریب دھماکے کی شدید الفاظ میں مذمت کی، انہوں نے کہا کہ ہلاک چینی شہریوں کے سوگوار خاندانوں کے غم میں برابر کے شریک ہیں، دکھ کی گھڑی میں چینی شہریوں کے خاندانوں سے مکمل یکجہتی کا اظہار کرتے ہیں، بزدل دشمن نے پاک چین دوستی کو نقصان پہنچانے کی گھناؤنی سازش کی، اس المناک واقعہ کے ذمہ داران قانون کی گرفت سے نہیں بچ پائیں گے۔

اس حوالے سے ترجمان دفتر خارجہ ممتاز زہرہ بلوچ نے بتایا کہ کراچی ایئرپورٹ کے قریب دہشت گردانہ حملے میں چینی انجینئرز کی اموات ہوئیں اور ایک زخمی ہوا، ہم چینی اور پاکستانی دونوں متاثرین کے خاندانوں سے تعزیت اور ہمدردی کا اظہار کرتے ہیں، واقعے میں زخمی ہونے والوں کی جلد صحت یابی کے لیے دعا گو ہیں، دہشت گردی کی یہ کارروائی پاکستان اور چین کی پائیدار دوستی پر بھی حملہ ہے، ہم اس بزدلانہ حملے کے ذمہ داروں کو انصاف کے کٹہرے میں لانے کے لیے پرعزم ہیں، پاکستان دہشت گردی کے خاتمے کے لیے اپنے چینی بھائیوں کے ساتھ مل کر کام کرتا رہے گا، قانون نافذ کرنے والے ادارے مجرموں اور ان کے سہولت کاروں کو منتقی انجام تک پہنچائیں گے۔
واضح رہے کہ رات گئے کراچی کے جناح انٹرنیشنل ایئر پورٹ کے قریب دھماکہ ہوا جس کے نتیجے میں 3 غیر ملکی ہلاک اور 17 افراد زخمی ہوئے جنہیں مختلف ہپستالوں میں منتقل کردیا گیا جبکہ دھماکے سے متعدد گاڑیاں بھی جل کر تباہ ہوگئیں، دہشت گرد حملے میں ہلاک ہونے والے 3 غیرملکی شہریوں کی شناخت ہوئی۔