اسلام آباد (نیشنل ٹائمز) گورنرخیبرپختونخواہ فیصل کریم کنڈی نے کہا ہے کہ خیبرپختونخواہ کو دہشتگردوں کے رحم وکرم پر نہیں چھوڑ سکتے ، امن وامان کی صورتحال کو سنجیدگی سے لیا جائے۔ میڈیا کے مطابق وزیراعظم شہبازشریف سے گورنر خیبرپختونخواہ فیصل کریم کنڈی نے ملاقات ، جس میں سیاسی صورتحال اورپی ٹی آئی کے احتجاج سے متعلق بات کی گئی ۔
گورنر فیصل کریم کنڈی نے کہا کہ وزیراعظم سے ملاقات میں خیبرپختونخواہ کی صورتحال پر بات چیت ہوئی، صوبے کی امن وامان کی صورتحال خراب ہے، خیبرپختونخواہ کو دہشتگردوں کے رحم وکرم پر نہیں چھوڑ سکتے ، وفاقی حکومت خیبرپختونخواہ کے معاملات کو سنجیدگی سے لے۔ وزیراعظم شہبازشریف نے آئندہ ہفتے خیبرپختونخواہ کا دورہ کرنے کا بھی فیصلہ کیا۔

بانی پی ٹی آئی کی ہدایت پر ڈی چوک میں سکیورٹی خدشات کے پیش نظر احتجاج کرنے والے کارکنوں کو گرفتار کیا جارہا ہے، پولیس نے عمران خان کی بہنوں علیمہ خان اور عظمیٰ خان کو ڈی چوک سے گرفتار کرلیا ہے، بانی پی ٹی آئی کی دونوں بہنوں کو ویمن تھانہ سیکرٹریٹ منتقل کر دیا گیا ہے۔ نجی ٹی وی کے مطابق حکومت کی جانب سے پی ٹی آئی کے 1590 کارکنوں کی گرفتاری کے احکامات جاری کر دیئے گئے ہیں۔
اسی طرح پنجاب کے 4 شہروں میں دفعہ 144 نافذ کرکے رینجرز بھی طلب کرلی گئی ہے۔دوسری جانب شنگھائی تعاون تنظیم کانفرنس کے سلسلے میں اسلام آباد میں فوج تعینات کرنے کا نوٹیفکیشن جاری کردیا گیا ہے، اسلام آباد میں 5 سے17 اکتوبر تک فوج تعینات رہے گی، وفاقی حکومت نے شنگھائی تعاون تنظیم کانفرنس کے پیش نظر وزیراعظم شہبازشریف کی منظوری کے بعد اسلام آباد میں 5 سے 17 اکتوبر تک فوج تعینات کردی ہے، فوج کی تعیناتی آرٹیکل 245 کے تحت کی گئی ہے۔ پولیس سمیت دیگر ادارے سکیورٹی یقینی بنانے کیلئے فوج کی معاونت کریں گے۔ یاد رہے شنگھائی تعاون تنظیم کا سربراہی اجلاس 15 اور 16 اکتوبر کو اسلام آباد میں ہوگا جس میں بھارت سمیت کئی ممالک کے سربراہان اور نمائندے شرکت کریں گے۔