اسلام آباد (نیشنل ٹائمز) سپیکر قومی اسمبلی سردار ایاز صادق نے مخصوص نشستوں کے معاملے پر الیکشن کمیشن کو خط لکھ دیا۔ تفصیلات کے مطابق سپیکر قومی اسمبلی سردار ایاز صادق نے چیف الیکشن کمشنر سکندر سلطان راجہ کے نام خط تحریر کیا، جس میں انہوں نے پارلیمانی بالادستی خودمختاری اور مخصوص نشستوں کا معاملہ اٹھایا، سپیکر نے مخصوص نشستوں سے متعلق پارلیمنٹ کے بنائے گئے نئے قانون کا بھی حوالہ دیا۔
خط میں کہا گیا ہے کہ یہ الیکشن کمیشن کا آئینی فرض ہے کہ وہ پارلیمنٹ کے بنائے گئے قانون کا احترام کرے، مخصوص نشستوں سے متعلق سپریم کورٹ کے فیصلے کے بعد قانون سازی کی گئی، الیکشن ایکٹ دوسری ترمیم پر الیکشن کمیشن مکمل عمل درآمد یقینی بنائے، پارلیمنٹ کی الیکشن ایکٹ میں ترمیم لاگو ہوچکی ہے، سپریم کورٹ نے ہدایت کی ہے وہ آزاد ارکان کو کسی اور پارٹی میں شمولیت کی اجاز ت دے، سپریم کورٹ نے اپنے فیصلے میں الیکشن کمیشن کو ہدایت دی ہے، سپریم کورٹ کے فیصلے بعد پارلیمنٹ نے الیکشن ترمیمی ایکٹ سات اگست کو منظور کرلیا۔
اسی طرح مسلم لیگ ن کے ارکان اسمبلی نے مخصوص نشستوں کے حصول کیلئے الیکشن کمیشن سے رجوع کرلیا، اس حوالے ن لیگی اراکین کی جانب سے دائر درخواست میں استدعا کی گئی ہے کہ قرار دیا جائے جس سیاسی جماعت نے مخصوص سیٹوں کی فہرست نہیں دی وہ مخصوص سیٹوں کی اہل نہیں، جن امیداروں نے انتخابات میں پارٹی وابستگی سرٹیفکیٹ جمع نہیں کرایا انہیں آزاد ڈکلیئرڈ کیا جائے۔
مسلم لیگ ن کے اراکین اسمبلی کا کہنا ہے کہ پارلیمنٹ نے الیکشن ایکٹ میں ترمیم کردی ہے، پارلیمنٹ نے ترامیم کا اطلاق ماضی سے موثر قرار دیا ہے، ترامیم کے مطابق ایک مرتبہ وابستگی کا جمع سرٹیفکیٹ تبدیل نہیں ہو سکتا، الیکشن ایکٹ کے مطابق فہرست جمع نہ کرانے والی جماعت مخصوص نشستوں کی اہل نہیں، قرار دیا جائے جن آزاد ارکان نے کسی سیاسی جماعت میں شمولیت اختیار کی وہ دوبارہ پارٹی تبدیل نہیں کرسکتے۔
