پشاور (نیشنل ٹائمز) مشیر اطلاعات خیبر پختونخوا بیرسٹر محمد علی سیف نے وزیراعلیٰ علی امین گنڈاپور اور روپوش پی ٹی آئی رہنماء مراد سعید کے رابطوں کی خبر کی تر دید کر دی۔ اپنے ایک بیان میں انہوں نے کہا کہ اس خبر میں کوئی صداقت نہیں، مراد سعید صوبے کے انتظامی معاملات میں کوئی مداخلت نہیں کر رہے، شکیل خان کے معاملے پر وزیراعلیٰ نے مراد سعید سے کوئی بات چیت نہیں کی، شکیل خان سے متعلق فیصلہ گڈ گورننس کمیٹی رپورٹ کے تناظر میں کیا گیا، عاطف خان سے متعلق بھی وزیراعلیٰ کا مراد سعید سے کوئی رابطہ نہیں۔
مشیر اطلاعات خیبر پختونخوا کا کہنا ہے کہ مخالفین غلط خبریں پھیلا کر سیاسی فائدہ اٹھانے کی ناکام کوشش کر رہے ہیں، مشعال یوسفزئی سمیت تمام رہنما پی ٹی آئی کے جھنڈے تلے منظم ہیں، علی امین گنڈاپور انتظامی اور سیاسی معاملات میں بانی پی ٹی آئی کی رہ نمائی حاصل کرتے ہیں۔
گزشتہ روز ایک خبر میں پاکستان تحریک انصاف کے روپوش رہنماء مراد سعید کا پارٹی قیادت اور وزیراعلیٰ علی امین گنڈاپور سے رابطوں کا انکشاف کیا گیا اور دعویٰ کیا گیا تھا کہ مراد سعید روپوشی کے باوجود خیبر پختونخواہ حکومت اور پارٹی کے اہم فیصلے کرنے والوں میں شامل ہیں، وزیراعلیٰ علی امین گنڈا پور سمیت متعدد رہنما مراد سعید سے مسلسل رابطے میں ہیں، روپوش پارٹی رہنماءنے عاطف خان اور شکیل خان کو عہدوں سے ہٹانے کی تحریک شروع کی جب کہ مرادسعید نے ہی وزیراعلیٰ خیبرپختونخواہ علی امین گنڈاپور کو شکیل خان کے معاملات پر سخت ردعمل دینے پر آمادہ کیا، پی ٹی آئی خیبر پختونخواہ اور پارلیمانی پارٹی میں اختلافات کے پیچھے بھی رہنماءپی ٹی آئی مراد سعید کا کردار ہے، مراد سعید مخالف گروپ کے رہنما کی بانی پی ٹی آئی عمران خان سے ملاقات کرانے پربھی مشال یوسفزئی کو ہٹایا گیا۔
