اسلام آباد (نیشنل ٹائمز) وزیردفاع خواجہ آصف نے کہا ہے کہ 9 مئی آپریشن فالس فلیگ تھا تو عمران خان اسٹیبلشمنٹ سے مذاکرات کیوں کرنا چاہتے، محمود اچکزئی نے کہا کہ میں پی ٹی آئی کی طرف سے اسٹیبلشمنٹ سے بات نہیں کرسکتا، عمران خان اچکزئی کو اس لئے آگے کر رہے ہیں تاکہ کل کو مکر سکیں۔ انہوں نے جیو نیوز کے پروگرام میں گفتگو کرتے ہوئے کہا کہ شروع میں عمران خان نے کہا تھا کہ محمود اچکزئی کو سیاسی جماعتوں سے بات کرنے کا مینڈیٹ دیا ہے، بانی پی ٹی آئی نے پھر جیل سے کہا کہ میں تو کہا تھا کہ سیاسی جماعتوں کے ساتھ بات کرنے کا مینڈیٹ نہیں دیا تھا۔
اب پھر کہا کہ میں سیاسی جماعتوں کے ساتھ اس لئے بات نہیں کروں گا کہ 8فروری کے الیکشن کو تسلیم کرنے کے مترادف ہے۔

مطلب بانی پی ٹی آئی کے بیانات میں تضاد ہے۔ لیکن جب میں اسمبلی فلور پر محمود اچکزئی سے پوچھا تومحمود اچکزئی نے کہا کہ میں کسی کی طرف سے اسٹیبلشمنٹ سے بات نہیں کرسکتا۔عمران خان اچکزئی کو اس لئے آگے کر رہے ہیں تاکہ کل کو مکر سکیں۔

انہوں نے کہا کہ 9مئی ایک قومی سانحہ ہے، اس میں سب کو ساتھ کھڑے ہونا چاہئے۔ اسٹیبلشمنٹ کی طرف سے ہم سے کوئی مطالبہ یا شرط نہیں ہے۔پی ٹی آئی والے سیاسی جماعتوں کے ساتھ مذاکرات نہیں کرنا چاہتے۔ جب تک 9مئی کا حساب نہیں ہوتا مذاکرات نہیں ہوسکتے۔پی ٹی آئی کو اسٹیبلشمنٹ کا پرانا نشہ ہے، ان کی گود میں پرورش پائی، یہ بھول جاتے ہیں کہ نہ باجوہ رہے نہ فیض ، 9فالس فلیگ تھا تو عمران خان ان سے بات کیوں کرنا چاہتے ہیں؟یہ این آراو کی بھرپور کوشش کررہے ہیں، راؤف حسن روز این آراو کیلئے ترلے کررہا ہوتا ہے۔پی ٹی آئی کی سیاست کا کوئی سرپیر نہیں ہے، پی ٹی آئی کو مذاکرات سے پہلے اپنے مئوقف میں تبدیلی لانی چاہئے۔