پشاور (نیشنل ٹائمز) خیبرپختونخوا حکومت نے دینی تعلیم کے فروغ اور طلباء کو دینی تعلیم کی طرف راغب کرنے کیلئے صوبے بھر بشمول ضم شدہ قبائلی اضلاع کے ایک ہزار سے زائد دینی مدارس میں مفت سولرسسٹم کی تنصیب کا فیصلہ کرلیا، وزیراعلیٰ خیبرپختونخوا کی ہدایات کی روشنی میں محکمہ اوقاف ومذہبی امور خیبرپختونخوا جلد ہر ضلع میں دینی مدارس کو شمسی توانائی پر منتقل کرنے کیلئے صوبے بھر میں محکمہ توانائی کے تعاون سے سروے کا آغاز کرے گا۔
تفصیلات کے مطابق محکمہ اوقاف کی درخواست پر سیکریٹری توانائی و برقیات نثاراحمد خان کی زیرصدارت سالانہ ترقیاتی پروگرام کے تحت رجسٹرڈ دینی مدارس کی سولرائزیشن کے حوالے سے ایک خصوصی اجلاس منعقد ہوا، جس میں سیکریٹری اوقاف و مذہبی امور عادل صدیق، پراجیکٹ ڈائریکٹرسولرائزیشن انجینئراسفند یار خان موسیٰ زئی اور سینئر پلاننگ آفیسر انجینئر لقمان حکیم نے شرکت کی۔
اجلاس میں سیکرٹری اوقاف عادل صدیق نے بتایا کہ ڈائریکٹرجنرل مذہبی تعلیم حکومت پاکستان کی مشاورت سے سروے کے بعد صوبے بھر میں رجسٹرڈ دینی مدارس کو مفت سولر سسٹم کی فراہمی کے لیے محکمہ توانائی وبرقیات کے تعاون سے منصوبے پر جلد کام کا آغازکیا جائے گا اور ہر مدرسے کو ضرورت کے مطابق سولرسسٹم فراہم کیا جائے گا۔ اس موقع پر سیکرٹری توانائی نثاراحمد خان نے متعلقہ پراجیکٹ ڈائریکٹر کو ہدایت جاری کی کہ محکمہ اوقاف ومذہبی امور کے ساتھ مل کر سروے کرکے منصوبے کا پی سی ون تیار کیا جائے تاکہ منصوبے پر فوری طورپر عملی کام کاآغازکیا جائے، انہوں نے منصوبے کی بروقت تکمیل کے لئے محکمہ اوقاف کی طرف سے فنڈز کی بروقت فراہمی کو یقینی بنانے اور ہر ضلع کے تناسب سے رجسٹرڈ دینی مدارس کی سولرائزیشن کے لئے لسٹیں مرتب کرکے فراہم کرنے پر زور دیا۔
