لاہور(نیشنل ٹائمز) سابق وزیراعلی پنجاب چوہدری پرویزالہی نے کہا ہے کہ طبیعت کی خرابی کے باوجود عدالت کے احترام میں آیا ہوں، معزز جج کا حکم تھا اس لیے بیماری کی حالت میں آنا پڑا. لاہور کی سپیشل سینٹر کورٹ میں پرویز الہی و دیگر کیخلاف منی لانڈرنگ کیس کی سماعت کے دوران صحافیوں سے گفتگو کے دوران سابق وزیراعلی پنجاب نے صحافی کے سوال پر کہا کہ شہباز شریف کو پیغام دو کہ وہ اس کرسی پر آکر بیٹھ جائیں اور میں وہاں چلا جاتا ہوں.
سابق وزیراعلی کے وکیل عامر سعید راں نے کہا کہ چوہدری پرویز الہی ملکی سیاست پر بات نہیں کریں گے جس پر پرویز الہی بولے کہ میرے لیگل ایڈوائزر بیٹھے ہیں باقی وہ آپ کو بتائیں گے.

دریں اثناءسپیشل سینٹرل کورٹ لاہور نے سابق وزیراعلی پنجاب چوہدری پرویز الہی و دیگر کیخلاف منی لانڈرنگ کیس کی کارروائی 19 ستمبر تک ملتوی کر دی لاہور کی سپیشل سینٹر کورٹ میں پرویز الہی و دیگر کیخلاف منی لانڈرنگ کیس کی سماعت ہوئی، سابق وزیراعلی پنجاب، زارا الہی و دیگر ملزمان نے عدالت پیش ہو کر حاضری مکمل کرائی.

سابق وزیراعلی پنجاب کی جانب سے عامر سعید راں ایڈووکیٹ عدالت پیش ہوئے دوران سماعت پرویز الہی نے جج سے مکالمہ کرتے ہوئے کہا کہ طبیعت بہت ناساز ہے جس پرعدالت نے انہیں کمرہ عدالت میں بیٹھے کی ہدایت کردی. سابق وزیراعلی کے وکیل نے کہا کہ زارا الہی پردہ نشین خاتون ہیں ان کی مستقل حاضری معافی کی درخواست دائر کی ہے جب فرد جرم عائد ہوگی اس وقت آجائیں گی بعدازاں عدالت نے سابق وزیراعلی پنجاب چوہدری پرویز الہی، زارا الہی و دیگر کیخلاف منی لانڈرنگ کیس کی مزید کارروائی 19 ستمبر تک ملتوی کردی.