پشاور(نیشنل ٹائمز) پاکستان پیپلز پارٹی کے چیئرمین بلاول بھٹو زرداری نے خیبرپختونخوا کے ضلع کرم ایجنسی میں دو قبائل کے درمیان مسلح تصادم میں قیمتی جانوں کے ضیاع پر اظہارِ افسوس کیا ہے ۔جاری بیان کے مطابق بلاول بھٹو نے کہا کہ کسی کو قانون ہاتھ میں اٹھانے کی اجازت نہیں دی جاسکتی، فریقین قانون کی پاسداری کریں جب کہ امن و امان کو یقینی بنانا خیبرپختونخوا حکومت کی اولین ذمہ داری ہے۔چیئرمین پیپلزپارٹی کا کہنا تھا کہ تنازعہ کے دوران راکٹ لانچرز سمیت بھاری اسلحہ استعمال کیا گیا ہے ۔بلاول بھٹو نے مزید کہا کہ قبائلی جھگڑے زمانہ جاہلیت کی یادگار ہیں، پاکستان کو مساوات پر کھڑا ترقی پسند معاشرہ بننا ہے۔ واضح رہے کہ خیبرپختونخوا کے ضلع کرم میں 5 روز سے جاری جھڑپوں کے دوران 35 افراد جاں بحق اور 166 افراد زخمی ہوچکے ہیں جس کے بعد دونوں قبائل کے عمائدین فائر بندی پر رضامند ہوگئے ہیں۔