کراچی (آئی این پی) اداکار فواد خان اور صنم سعید کی نئی ویب سیریز برزخ میں ہم جنس پرستی پر مبنی مناظر دکھائے جانے پر ناظرین کی جانب سے شدید ردِعمل سامنے آگیا۔ سلمان شاہد، فواد خان اور صنم سعید جیسے منجھے ہوئے اداکار اس ویب سیریز میں مرکزی کردار نبھا رہے ہیں۔ اس ویب سیریز میں ہم جنس پرستی حساس اور متنازع موضوع کو چھوا گیا ہے جس پر مداح برہم نظر آرہے ہیں۔ ڈرامے میں سلمان شاہد نے جعفر خانزادہ کا کردار نبھایا ہے، سیف اللہ ان کا بڑا بیٹا ہے جس کا بچپن سے ہی ہم جنس پرستانہ رجحان دکھایا گیا ہے۔ ڈرامے میں ہم جنس پرستی کے عنصر پر ناظرین نے شدید مایوسی اور برہمی کا اظہار کرتے ہوئے اسے غیراسلامی تصورات کو عام کرنے کی کوشش قرار دیا ہے۔ سوشل میڈیا صارفین کا کہنا ہے کہ اس طرح کے مواد پر مبنی ڈرامے، اداکاروں، لکھاریوں اور ہدایت کاروں کی ہر سطح پر اعلانیہ مذمت کی جانی چاہیے۔