اسلام آباد (نیشنل ٹائمز)میکسیکن بحریہ نے امریکا کو انتہائی مطلوب مفرور بدنام زمانہ ڈرگ ڈیلر رافیل کیرو کوئنٹرو کو گرفتار کر لیا۔ الجزیرہ کی رپورٹ کے مطابق میکسیکو کی نیوی نے 1985 میں ایک امریکی انسداد منشیات ایجنٹ کے قتل کے الزام میں بدنام زمانہ منشیات اسمگل کرنے والے گروہ کے سرغنہ رافیل کیرو کوئنٹرو کی گرفتاری کی تصدیق کرتے ہوئے بتایا کہ ملزم کو شمال مغربی ریاست سینالووا کی میونسپلٹی چوئکس سے حراست میں لیا گیا جسے میکسیکو میں منشیات اسمگلنگ کا گڑھ تصور کیا جاتاہے۔ملزم 1980 کی دہائی کی منشیات اسمگل کرنے والی انتہائی بااثر تنظیم کا سرغنہ ہے جس کی گرفتاری کے لیے امریکا نے بھی قیمت مقرر کر رکھی ہے۔وائٹ ہاؤس کے سنئیر ایڈوائزر نے میکسیکو کی اس کامیابی کو سہراتے ہوئے کہا کہ امریکا ملزم کو واشنگٹن کے حوالے کرنے کی درخواست میں بالکل بھی وقت ضائع نہیں کرے گا۔رپورٹ میں یہ بھی بتایا گیا ہے کہ گرفتار ملزم رافیل کیرو امریکا کے اینٹی ڈرگ ایجنٹ کے قتل کے جرم میں 28 سال کی قید کاٹ چکا ہے، ملزم کو میکسیکو کے جج نے تکنیکی بنیادوں پر 2013 میں رہا کیا تھا۔امریکی حکام کے مطابق ملزم ایف بی آئی کی 10 انتہائی مطلوب مفرور افراد کی فہرست میں شامل ہے اور اس کی گرفتاری پر 20 ملین ڈالر کی انعامی رقم بھی رکھی گئی ہے۔