اسلام آباد (نیشنل ٹائمز)سابق امریکی صدر ڈونلڈ ٹرمپ کی سابقہ اہلیہ ایوانا ٹرمپ 73 سال کی عمر میں چل بسیں جس کی اطلاع ٹرمپ نے سوشل میڈیا کے ذریعے دی ہے۔بین الاقوامی میڈیا رپورٹس کے مطابق سابق امریکی صدر ڈونلڈ ٹرمپ کی پہلی بیوی ایوانا ٹرمپ گزشتہ روز نیویارک میں اپنے اپارٹمنٹ میں چل بسیں۔رپورٹس میں بتایا گیا ہے کہ گزشتہ روز امریکی وقت کے مطابق دوپہر 12 بج کر 30 منٹ پر ایمرجنسی سروس حکام کو ایوانا ٹرمپ کے دل کے دورے کی اطلاع دی گئی تھی لیکن جب ٹیم اُن کے اپارٹمنٹ پہنچی تو اُن کی موت واقع ہو چکی تھی۔دوسری جانب ڈونلڈ ٹرمپ نے سوشل میڈیا پر جاری کیے گئے اپنے بیان میں کہا ہے کہ ایوانا ٹرمپ کا نیویارک شہر میں اپنے گھر میں انتقال ہوگیا ہے، مجھے ان تمام لوگوں کو بتاتے ہوئے بہت دکھ ہو رہا ہے جو ایوانا سے محبت کرتے تھے، جن میں بہت سے لوگ شامل ہیں۔ٹرمپ نے مزید کہا ہے کہ وہ ایک شاندار، خوبصورت اور حیرت انگیز خاتون تھیں جنہوں نے ایک عظیم اور متاثر کُن زندگی گزاری۔اُنہوں نے یہ بھی کہا ہے کہ ایوانا کا فخر اور خوشی اُن کے 3 بچے ڈونلڈ جونیئر، ایوانکا اور ایرک تھے، وہ ان پر بہت فخر کرتی تھیں، جیسا کہ ہم سب کو ایوانا پر فخر ہے۔دوسری جانب خاندان کب جانب سے جاری کیے گئے بیان میں کہا گیا ہے کہ ایوانا ٹرمپ کے پسماندگان میں ان کی والدہ، ان کے 3 بچے اور 10 پوتے ہیں۔واضح رہے کہ ٹرمپ اور ایوانا نے 1977ء میں شادی کی تھی اور 1992ء میں ان کے درمیان طلاق ہو گئی تھی۔