اسلام آباد (نیشنل ٹائمز)پاکستان تحریک انصاف (پی ٹی آئی) کے رہنما شاہ محمود قریشی کا کہنا ہےکہ مفتاح اسماعیل کا اکنامک سروے ہمارے دور کی معیشت کی تعریف کر رہا ہے، وہ خود کہہ رہے ہیں کہ ملک دیوالیہ کے قریب ہے۔ملتان میں میڈیا سےگفتگو کرتے ہوئے شاہ محمود قریشی کا کہنا تھا کہ شاہد خاقان عباسی پیٹرول کی قیمت مزید بڑھانےکی بات کر رہے ہیں، بلاول کہتے تھے یہ پی ٹی آئی ایم ایف ہیں، آپ تو نہیں ہیں، تو آئی ایم ایف کو مسترد کردو، ان کا مقصد نیب کو ختم کرنا تھا کردیا، میثاق معیشت یہ کس سے کرنا چاہتےہیں؟ شاہ محمود قریشی کا کہنا تھا کہ پنجاب اسمبلی کی بیس نشستوں پر ہونے والے ضمنی انتخاب میں ن لیگ کے سرکاری امیدواروں نے 14 سیٹوں پر کامیابی کا ابھی سے دعویٰ کردیا ہے، ایسی صورت حال میں عام انتخابات کے کیا نتائج ہوسکتے ہیں اس بات کا اندازہ لگایا جاسکتاہے۔انہوں نےکہا کہ مشاورت اور دوستوں کے اتفاق رائے سے زین قریشی کو ٹکٹ دیا، ہم یہ الیکشن اس وقت لڑ رہےہیں جب حکومت ہمارے خلاف ہے، آج پارٹی پرمشکل وقت ہے ہم نے خود کو آزمائش کے لیے پیش کیا ہے، ہم میدان میں اتر کر فرسودہ نظام کو بدلنا چاہتےہیں، الیکشن سے پہلے ہی سرکاری امیدوار فنڈز کا اعلان کر رہے ہیں، ٹرانسفر پوسٹنگ ہو رہی ہیں لیکن سرکاری امیدوار کے خلاف حریفوں کا نقطہ نظر نہیں سنا جا رہا۔ان کا کہنا تھا کہ سیاست میں کچھ حرف آخر نہیں، سراج الحق ہمارے ووٹوں پر سینیٹر منتخب ہوئے۔صحافی نے سوال کیا کہ کیا لانگ مارچ کی کال دے رہے ہیں؟ اس پر انہوں نے جواب دیا کہ انتظار فرمائیے۔