اسلام آباد (نیشنل ٹائمز)امریکا نے بیرون ملک سے آنے والے مسافروں کے لیے کووڈ 19 ٹیسٹ کی شرط کو ختم کردیا ہے۔مسافروں کے کووڈ ٹیسٹ کی پابندی سابق صدر ڈونلڈ ٹرمپ کی انتظامیہ نے 2021 کے شروع میں عائد کی تھی، جسے بعد ازاں جو بائیڈن انتظامیہ نے سخت کردیا تھا۔بیرون ملک سے آنے والے تمام مسافروں بشمول امریکی شہریوں کو بھی پرواز پر سوار ہونے سے ایک دن قبل کووڈ ٹیسٹ کرانا ہوتا تھا اور نیگیٹو ٹیسٹ پر ہی انہیں سفر کی اجازت ہوتی تھی۔لیکن اب کووڈ ٹیسٹ کی پابندی کو 12 جون سے ختم کیا جارہا ہے۔فضائی کمپنیوں کی جانب سے کافی عرصے سے امریکی حکام سے یہ پابندی ختم کرنے کا مطالبہ کیا جارہا تھا۔حکام کے مطابق سینٹرز فار ڈیزیز کنٹرول اینڈ پریونٹیشن کی جانب سے 3 ماہ تک اس فیصلے کے اثرات کا جائزہ لیا جائے گا۔