اسلام آباد(نیشنل ٹائمز)مسلم لیگ ن کے رہنما شاہد خاقان عباسی کا کہنا ہے کہ استحکام کا معاملہ حل ہوچکا ہے، 17 اکتوبر تک معاملات بہتر ہوجائیں گے۔احتساب عدالت کے باہر میڈیا سے گفتگو کرتے ہوئے شاہد خاقان عباسی نے کہا کہ 4 سال کی کوتاہیوں کے اثرات ایک دن میں ختم نہیں ہوتے، ملک کے معاملات کو درست کرنے میں وقت چاہیے۔انہوں نے کہا کہ آج سب کو مل کر محنت کرنا ہوگی اور ان معاملات کو حل کرنا ہوگا، کوشش ہے کہ بجلی کی لوڈ شیڈنگ کو کم کیا جائے۔شاہد خاقان عباسی کا یہ بھی کہنا تھا کہ 15 جون کے بعد لوڈ شیڈنگ 3 گھنٹے ہوگی جبکہ 30 جون تک امید ہے کہ لوڈ شیڈنگ 2 گھنٹے کے لگ بھگ ہوجائے گی۔مسلم لیگ ن کے رہنما نے کہا کہ سابق حکمرانوں نے ملک کو تباہ کردیا ہے، عمران خان جواب دیں کہ وہ 4 سال کرتے کیا رہے ہیں۔ان کا کہنا تھا کہ نیب کا ادارہ ختم کرنا ملکی مفاد میں ہے، مسلم لیگ ن کے جتنے بھی کیسز ہیں نیب کے خاتمے کے بعد چلتے رہیں، ہمارے کیسز کا حال یہ ہے کہ کوئی پراسیکیوشن نہیں ہورہی۔خیال رہے کہ سابق ایم ڈی پی ایس او کی غیر قانونی تعیناتی کے ریفرنس پر سماعت ہوئی، جس میں شاہد خاقان عباسی و دیگر ملزمان احتساب عدالت میں پیش ہوئے، ریفرنس کی سماعت بغیر کارروائی 17 اگست تک ملتوی کردی گئی۔