کراچی (نیشنل ٹائمز) کراچی تاجر اتحاد نے حکومت کا رات ساڑھے8 بجے مارکیٹیں بند کرنے کا فیصلہ مسترد کردیا،چیئرمین کراچی تاجراتحاد کا کہنا ہےکہ حکومتی فیصلے سے کاروبار کو شدید نقصان ہوگا جبکہ بےروزگاری بھی بڑھےگی، لوڈشیڈنگ کے خاتمے کیلئے آئی پی پیز کو کنٹرول کیا جائے۔ ہم نیوز کے مطابق کراچی تاجراتحاد نے حکومت کا رات ساڑھے8 بجے مارکیٹیں بند کرنےکا فیصلہ مسترد کردیا ہے، حکومت کے فیصلے سے تاجربرادری کو شدید نقصان ہوگا، مارکیٹیں بند ہونے سے بےروزگاری بڑھے گی۔
تاجروں نے کہا کہ حکومت لوڈشیڈنگ کے خاتمے کیلئے آئی پی پیز کو کنٹرول کرے، لائن لاسز والے علاقوں میں صورتحال کو کنٹرول کیا جائے۔یاد رہے جیو نیوز کے مطابق وزیراعظم شہباز شریف کی زیر صدارت قومی اقتصادی کونسل کے اجلاس میں اہم مشاورت مکمل کر لی گئی۔

ملک میں توانائی کی بچت کے اقدامات، بازار ساڑھے 8 بجے بند کرنے پر صوبوں نے اتفاق کیا۔

قومی اقتصادی کونسل نے توانائی کے بحران سے نمٹنے کے لیے اقدامات پر وفاقی کابینہ کے فیصلوں سے اصولی اتفاق کر لیا۔ قبل ازیں تاجروں نے شام 7 بجے مارکیٹیں بند کرنے سے انکار کر دیا۔ آل پاکستان انجمن تاجران نے شام 7 بجے دکانیں بند کرنے کی تجویز مسترد کر دی۔صدر اجمل بلوچ نے حکومت کی طرف سے انرجی کنزرویشن کے لیے اعلان کردہ اقدامات پر ردِعمل دیتے ہوئے کہا کہ تاجر کسی صورت اپنا کاروبار شام 7 بجے بند نہیں کریں گے۔
حکومت تاجر برادری کے لیے آسانیاں پیدا کرے نہ کہ مشکلات کھڑی کرے۔ہر اس سیکٹر کی بجلی بند کی جائے جو مفت میں استعمال ہو رہی ہے۔ حکمران اپنے اے سی بند کریں گے تو غریب کا پنکھا چلے گا۔انہوں نے مزید کہا کہ تاجر شام 6 بجے سے رات 10 بجے تک سب سے مہنگی بجلی خریدتا ہے۔اتنی شدید گرمی میں خریدار کا نکلنا ممکن ہی نہیں۔ خریدار شام سے پہلے گھر سے خریداری کے لیے نہیں نکلتا لہذا صبح دکانیں کھولنے کی تجویز ناقابل عمل ہے۔