اسلام آباد(نیشنل ٹائمز)بالی ووڈ کی سینئر اداکارہ، فلمساز و ہدایت کار اور کوریوگرافر فرح خان نے کہا ہے کہ آنجہانی گلوکار کرشناکمار کناتھ المعروف کے کے کبھی نیٹ ورکنگ (لوگوں سے تعلقات بنانے) کی پرواہ نہیں کیا کرتے تھے، وہ دراصل حقیقی فنکار تھے۔ فرح خان کا کہنا تھا کہ کے کے کو تو بس اپنے کام (گلوکاری) سے لگاؤ تھا اور وہ اسی چیز کا سب سے زیادہ خیال رکھتے تھے۔ یاد رہے کے کے کا گزشتہ منگل کو مغربی بنگال کے صدر مقام کولکتہ کے ایک کالج فیسٹول میں پرفارمنس کے بعد دل کا دورہ پڑنے سے چل بسے تھے۔کے کے نے فرح خان کی فلموں میں کئی گیت گائے تھے۔ ابو ظبی میں منعقدہ انٹرنیشنل انڈین فلم اکیڈمی ایوارڈز میں شریک فرح خان نے کرشناکمار کناتھ کے بارے میں گفتگو کرتے ہوئے کہا کہ ان کی آخری ملاقات کے موقع پر کے کے نے ان سے کہا تھا کہ وہ جلد ہی فلم بنائیں، تاکہ میں اس میں گلوکاری کرسکوں۔ فرح خان نے کہا کہ انٹرنیشنل انڈین فلم اکیڈمی ایوارڈز میں ایک یادگاری سیگمنٹ میں کے کے کو خراج عقیدت پیش کیا جائے گا۔