اسلام آباد(نیشنل ٹائمز)سابق وزیراعظم اور چیئرمین پاکستان تحریک انصاف (پی ٹی آئی) عمران خان نے کہا ہے کہ امپورٹڈ حکومت خوفزدہ ہے،آصف زرداری واقعی ن لیگ پر بھاری ہے۔کوہاٹ میں جلسہ عام سے خطاب میں عمران خان نے کہا کہ آج کوہاٹ کی تاریخ کا سب سے بڑاجلسہ ہے،شہباز شریف پھنس گیا ہے، آگے سمندر اور پیچھے ٹائیگرز ہیں۔انہوں نے کہاکہ شہباز شریف کو وزیراعظم بننے کا بڑا شوق تھا،پٹرول اور ڈیزل کی قیمتیں بڑھنے لگی ہیں،یہ امپورٹڈ حکومت خوفزدہ ہے۔پی ٹی آئی چیئرمین نے مزید کہاکہ جہاں سے یہ امپورٹ ہوئے ہیں، وہاں سے حکم ہوا ہے کہ پٹرول اور ڈیزل کی قیمت بڑھائی جائے ۔اُن کا کہنا تھاکہ شہباز شریف سے پہلے بڑا بھائی وزیراعظم تھا ، اس نے بڑی دیر سے اچکن سلوائی ہوئی تھی۔عمران خان نے یہ بھی کہا کہ شہباز شریف بے چارہ بوٹ پالش کرکے یہاں تک پہنچا ہے لیکن سب سے زیادہ مزے میں آصف زرداری ہے۔انہوں نے کہا کہ آصف زرداری واقعی ن لیگ پر بھاری پڑگیا ہے، ان تینوں نے زور لگاکر ہماری حکومت گرائی ،اس وقت ساری گالیاں شہباز شریف کو پڑرہی ہیں۔سابق وزیراعظم نے کہا کہ میں امریکیوں کو بہت اچھی طرح جانتا ہوں ، وہ کبھی ایسے ہی ڈالر نہیں دیتے، وہ ڈالر دیں گے تو مزید غلامی کروائیں گے۔