اسلام آباد(نیشنل ٹائمز)سابق وزیر داخلہ اور عوامی مسلم لیگ کے سربراہ شیخ رشید احمد نے اپنے دعوے کو ایک مرتبہ پھر دہراتے ہوئے کہا ہے کہ کہتا تھا ن سے ش نکلے گی، اس وقت کہاں ہے ن لیگ؟اسلام آباد میں پریس کانفرنس کرتے ہوئے انہوں نے کہا کہ یہ ہمیں سلیکٹڈ کہتے تھے اور یہ خود سلیکٹڈ اور امپورٹڈ ہیں، آپ دنیا کے جس ملک میں جائیں گے گندے انڈے اور ٹماٹر پڑیں گے۔شیخ رشید کا کہنا تھا کہ ملک میں ایک دوسرے کے خلاف نفرت اور تشویش ناک صورت حال ہے، پنجاب میں منحرف ارکان نااہل ہوجائیں گے تو نیا کٹا کھل جائے گا۔انہوں نے کہا کہ ملک کی سیاسی صورت حال کو خطرات لاحق ہیں۔ان کا کہنا تھا کہ پاک فوج کا احترام ہونا چاہیے۔ شیخ رشید احمد نے مسجد نبویﷺ پر ہوئے واقعے پر اظہارِ افسوس کرتے ہوئے کہا کہ جو ہوا وہ نہیں ہونا چاہیے تھا۔ان کا کہنا تھا کہ یہ پانچ افراد یورپ سمیت جہاں بھی جائیں گے ان کو گندے انڈے پڑیں گے۔شیخ رشید نے کہا کہ جمہوریت سوا نیزے پر کھڑی ہے، میں بڑا لیڈر نہیں بننا چاہتا، آپ مجھے بڑا لیڈر بنانا چاہتے ہیں۔انہوں نے یہ بھی کہا کہ عمران خان پر برا وقت آیا ہے، عمران خان کو ایسے وقت میں چھوڑنا غداری سمجھتا ہوں