اسلام آباد (نیشنل ٹائمز)چیئرمین پی ٹی آئی عمران خان نے بشریٰ بی بی کی دوست فرح خان کی مبینہ کرپشن کی خبروں پر پہلی مرتبہ تبصرہ کیا ہے۔انہوں نے فرح خان کے حوالے سے کہا کہ اُن کے پاس عہدہ تھا نہ وزارت ، وہ کیسے پیسے لے سکتی ہیں۔ عمران خان نے صحافیوں سےغیر رسمی گفتگو میں کہا کہ اتحادیوں کو ٹکٹ دیکر سبق سیکھا ہے کہ اتحادی نہیں ہونے چاہئیں۔انہوں نے کہا کہ پچھلے انتخابات میں ٹکٹوں پر توجہ نہیں دی تھی ، اس بار ٹکٹس خود دیکھ کر دوں گا۔عمران خان نے کہا کہ میرے خلاف اس وقت سازش ہوئی جب چیزیں ٹھیک ہورہی تھیں،میری اس مافیا سے لڑائی تھی جو قیمتیں اوپر لے جارہی تھی۔انہوں نے کہا کہ ایف آئی اے میں تبدیلیاں ہورہی ہیں، 24 ارب کی تفتیش کرنےوالوں کو تبدیل کیا جارہا ہے۔عمران خان نے کہا کہ جسٹس قاضی فائزعیسیٰ کے خلاف ریفرنس دائر نہیں کرنا چاہیے تھا، ریفرنس اس وقت وزارت قانون کی جانب سے بھیجا گیا تھا۔انہوں نے واضح کیا کہ میری کسی سے کوئی ذاتی عناد نہیں ہے۔